Кніжна-ілюстрацыйная выстаўка “Высокая якасць” прымеркавана да Года якасці, якім аб’яўлены 2024. У экспазіцыі – выданні і плакаты з фонду Нацыянальнай бібліятэкі Беларусі, якія расказваюць аб савецкім і сучасным разуменні катэгорыі якасці, а таксама аб успрыманні тэмы і праблемы якасці савецкімі мастакамі-плакатыстамі.
Тэма якасці як прадмет навуковага даследвання турбавала савецкіх і цікавіць сучасных беларускіх аўтараў. Адметнае месца адведзена выданням, якія адсылаюць да вытокаў распрацоўкі стандарта “Дзяржаўны знак якасці” і расказваюць пра конкурс “На выяву знака якасці” (1967), які праводзіўся ў СССР, пра вопыт прысваення Знака якасці прадпрыемствамі, чыя прадукцыя адпавядала высокаму тэхнічнаму ўзроўню, якасці і надзейнасці. Прадстаўлены на выстаўцы і комплекс дакументаў, які адлюстроўвае сучасныя падыходы да павышэння якасці жыцця беларускага народа, дэманструюць шматграннаць і патэнцыял эканомікі Беларусі, даступнаць і якасць адукацыі, адметнасць нацыянальнай культуры.
Якасць – адна з найбольш запатрабаваных у 1950–1980-х гг. бытавых сацыяльных тэм для мастакоў-плакатыстаў. З гумарам, іроніяй і натхненнем разглядаюцца праблемы якасці жыцця, працы, узровень якасці прадукцыі, тавараў і вытворчасці, як фабрычнай, швейнай, так і сельскагаспадарчай. Асаблівы водгук выклікаюць у аўтараў спецыфіка якасных будаўніцтва, абслугоўвання, паслуг і выхавання.
Шэраг плакатаў, прапанаваных гледачу, створаны знакамітымі графікамі Саюза мастакоў БССР Мікалаем Гурло, Францам Выпасам, Жаннай Сікора і г.д. У экспазіцыі – плакаты з серыі “Беларускі Агітплакат”, а таксама гумарыстычныя замалёўкі творчага аб’яднання мастакоў “Баявы аловак”, якое займалася агітацыйна-прапагандысцкай працай з 1939 г. Сярод аўтараў, што працавалі ў выданні, – вядомыя майстры сатыры, савецкія мастакі Віктар Травін, Уладзіслаў Кюнап, Дзмітрый Абазненка, Георгій Кавенчук, Леанід Камінскі і інш.
Выразныя, колкія, лаканічныя, насычаныя гумарам камічныя сюжэты сатырычных плакатаў выяўляюць дармаедаў, бракаробаў, гультаёў і хамаў. Агітацыйныя плакаты на тэму якасці яркія, неардынарныя, кідкія, напоўненыя годнасцю і прынцыповасцю, фармулёўкі выяўляюць упэўненасць у неабходнасці якаснай сучаснасці. Лаканічныя назвы і нечаканыя фразы-каламбуры ў загалоўках плакатаў і назвах выданняў, поўныя энергіі і натхнення, імкнення адзначыць, выявіць, выкараніць, абавязкова абараніць правую справу.
Экспазіцыя “Высокая якасць” прыцягвае ўвагу да самой ідэі якасці і выразна падкрэслівае неабходнасць яе прысутнасці ў паўсядзённым жыцці. Прымеркаваная да Года якасці яна распавядае пра мінулы і сённяшні дзень, пра прыкрыя і пацешныя супадзенні па-за часам, пра асаблівы каларыт савецкага побыту, які цікава ўзгадаць, і пра надзённыя навуковыя і практычныя вынаходкі ў прасторы беларускай якасці. Сучасны жыхар Беларусі, як і раней савецкі грамадзянін, вартыя таго, каб паслугі, тавары і ўмовы вакол яго былі выкананы на належным якасным узроўні.
Выстава размешчана ў галерэі “Мабільная” (3-ці паверх) з 26 сакавіка да 30 красавіка 2024 г.
Дата яе заканчэння можа быць зменена.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.
