З 27 ліпеня па 20 жніўня ў зале выяўленчых і відэадакументаў (пам. 307) праходзіць выстаўка “Я толькі морам і жыву”, прысвечаная 195-годдзю з дня нараджэння рускага жывапісца, марыніста, баталіста Івана Канстанцінавіча Айвазоўскага (1817–1900).
“Мора – гэта маё жыццё”, – пісаў мастак. Яго бязмежную далеч і прамяністыя ўсходы, чараўніцтва месяцовых начэй і грозную апантанасць бур ніхто не адлюстроўваў так паэтычна і натхнёна, як вялікі сын армянскага народа – І.К. Айвазоўскі.
Мастак бясконца доўга служыў “любімаму, прывабнаму краю”. Мецэнатствуючы, заснаваў у Феадосіі новую армянскую школу і друкарню, пабудаваў новую і адрамантаваў старую армянскія цэрквы, заснаваў агульнагарадское мастацкае вучылішча і гісторыка-археалагічны музей, узвёў капліцу ў памяць генерала П.С. Катлярэўскага, правёў у горад пітную ваду, садзейнічаў будаўніцтву чыгункі.
Дакументы, якія дэманструюцца на выстаўцы, адлюстроўваюць асноўныя этапы творчага шляху І.К. Айвазоўскага. Як мастак Галоўнага марскога штаба вялікі марыніст быў удзельнікам не толькі мірных і звычайных марскіх экспедыцый, але і баявых дзеянняў: ваяваў ля берагоў Каўказа, нароўні з салдатамі здзейсніў высадку пры Субашы.
Атрымаўшы першы афіцыйны заказ, выканаў віды практычна ўсіх партоў Балтыкі. Гэты перыяд адлюстраваны ў такіх работах, прадстаўленых у экспазіцыі, як “Наварынскі бой”, “Бой каля вострава Хіос”, “Кранштадскі рэйд” і інш.
За чатыры гады знаходжання ў Італіі жывапісец стварыў і паказаў гледачам дзясяткі карцін. Шэраг яго работ – “Неапалітанскі заліў уначы”, “Востраў Капры”, “Бура” і іншыя рэпрадукцыі, прадстаўленыя ў экспазіцыі, – удастоены залатых медалёў Рымскай і Парыжскай акадэмій, а карціна “Хаос” была набыта для музея Ватыкана. Варта адзначыць, што і аўтапартрэт мастака захоўваецца ў галерэі Уфіцы, – гэта высокі гонар для нямногіх выдатных аўтараў.
Найбольш поўна адлюстраваны мастаком феадасійскі перыяд. Карціны гэтай пары “Наваколлі Ялты”, “Месяцовая ноч ля ўзмор’я”, “Усход сонца ў Феадосіі” – сапраўдная песня фарбаў, ода прыгажосці роднай Кімерыі. Паводле волі І.К. Айвазоўскага, яго пахавалі ў Феадосіі ў двары армянскай царквы Святога Саркіса. Апошні шлях мастака быў высланы армянскімі дыванамі, а рускія ваенныя караблі залпамі аддалі свайму песняру развітальныя ўшанаванні.
У цэлым на выстаўцы прадстаўлена каля 80 дакументаў. Сярод іх – перапіска і мемуары мастака, манаграфія М.С. Барсамава пра жывапісца, прыжыццёвае выданне ў гонар пяцідзесяцігадовага юбілею І.К. Айвазоўскага (Санкт-Пецярбург, 1887) і інш. Асновай жа экспазіцыі сталі рэпрадукцыі шматлікіх работ вялікага марыніста.
Кантактны тэлефон: (+375-17) 293-27-16.