З 18 жніўня па 20 верасня ў зале беларускай літаратуры (пам. 205) праходзіць выстаўка “З кагорты беларускіх крытыкаў”, прымеркаваная да 100-годдзя з дня нараджэння беларускага літаратуразнаўца, крытыка Янкі Казекі (1915–2000).
Сярод імён даследчыкаў беларускай літаратуры XX ст. імя лаўрэата Дзяржаўнай прэміі Беларусі (1976) Янкі Казекі (Казекі Івана Дарафеевіча) займае бачнае месца, якое вызначылі яго глыбокія аналітычныя даследаванні жанру беларускай байкі ад яе вытокаў да сучаснасці, а таксама баечнай і драматургічнай творчасці К. Крапівы, Я. Коласа, Я. Купалы, якія атрымалі ўсебаковае раскрыццё ў кнігах крытычных нарысаў “Беларуская байка” (1960), “Няходжанай дарогай” (1975), “Кондрат Крапива” (1965, 1967).
Янка Казека ўвайшоў у гісторыю беларускага літаратуразнаўства таксама як даследчык творчасці Я. Коласа, К. Чорнага, З. Бядулі, П. Пестрака, П. Броўкі, А. Куляшова і інш. Ім прысвечаны раздзелы, артыкулы, эсэ ў аўтарскіх зборніках “З невычэрпных крыніц” (1958), “Натхненне і майстэрства” (1963), “Голас часу” (1975), “Падарожжа ў маладосць” (1984), а таксама асобныя кнігі – “Кузьма Чорны” (1980) і інш.
Характэрныя для аналітыка гістарызм, глыбокі аналіз спецыфікі літаратурных плыняў і з’яў, выяўленне адметных рыс творчасці пісьменніка робіць яго літаратуразнаўчыя працы цікавымі сучаснаму даследчыку і чытачу.
На выстаўцы прадстаўлены як аўтарскія выданні Я. Казекі, так і тыя, у падрыхтоўцы якіх ён прымаў удзел як рэдактар, член рэдакцыйнага савета, аўтар прадмоў і пасляслоўяў, складальнік. У ліку іх кнігі аўтабіяграфій беларускіх пісьменнікаў “Пяцьдзесят чатыры дарогі” (1963), “Вытокі песні” (1973), “Пра час і пра сябе” (1966), энцыклапедычны даведнік “Менск” (1980) і інш.
Дапаўняюць падборку перыядычныя выданні – часопісы “Беларусь”, “Народная асвета”, “Нёман”, “Полымя рэвалюцыі” (“Полымя”). У іх разам са шматлікімі артыкуламі прадстаўлены першыя часопісныя публікацыі Я. Казекі – апавяданне “Настаўніца” (“Полымя рэвалюцыі”, 1936, № 2) і літаратуразнаўчы артыкул “Аповесць Змітрака Бядулі «Салавей»” (“Полымя рэвалюцыі”, 1939, № 2).
У асобную групу матэрыялаў увайшла даведачна-энцыклапедычная літаратура, у якой адлюстравана біяграфічная інфармацыя пра Я. Казеку.
Усяго на юбілейнай выстаўцы дэманструецца звыш 50 выданняў.
Кантактны тэлефон: (8 017) 293 27 16.
 |
 |
 |
 |
 |
 |
