З 2 красавіка па 5 мая ў аддзеле абслугоўвання афіцыйнымі дакументамі (пам. 207) адкрыта выстаўка “Здаровы лад жыцця: міжнародны вопыт і стратэгія Беларусі”, прысвечаная Сусветнаму дню здароўя.

Гэты Дзень быў заснаваны на першай сесіі Сусветнай асамблеі аховы здароўя ў 1948 годзе і штогод адзначаецца 7 красавіка, пачынаючы з 1950 года. Дата выбрана не выпадкова – 7 красавіка 1948 года ўступіў у сілу Статут Сусветнай арганізацыі аховы здароўя (САЗ).

Сусветны дзень здароўя – гэта глабальная кампанія, накіраваная на прыцягненне ўвагі кожнага жыхара нашай планеты да праблем і аховы здароўя. Ён дае ўнікальную магчымасць завастрыць увагу сусветнай супольнасці на праблемах грамадскай аховы здароўя і пытаннях здароўя людзей і заахвоціць урады, міжнародныя арганізацыі, дзелавыя кругі і грамадзянскае супольніцтва да сумесных намаганняў, аб’яднаных для рашэння гэтых праблем.

Кожны год для Сусветнага дня здароўя выбіраецца тэма, якая адлюстроўвае пэўную глабальную праблему, што стаіць перад аховай здароўя планеты. “Бяспека харчовых прадуктаў” – тэма Сусветнага дня здароўя 2015 года.

Міжурадавай структурай ААН, закліканай каардынаваць міжнароднае супрацоўніцтва ў галіне аховы здароўя і глабальныя дзеянні па барацьбе з хваробамі, з’яўляецца Сусветная арганізацыя аховы здароўя (САЗ).

Рэспубліка Беларусь, адна з краін – заснавальніц САЗ, актыўна ўдзельнічае ў рабоце гэтай арганізацыі. Мэта супрацоўніцтва нашай дзяржавы з САЗ заключаецца ў тым, каб, выкарыстоўваючы сусветны вопыт, забяспечыць найбольш спрыяльныя ўмовы для ўдасканалення работы сістэмы аховы здароўя Беларусі. Супрацоўніцтва з САЗ дазваляе не толькі выкарыстаць вопыт гэтай арганізацыі, але і атрымліваць фінансавыя сродкі, а таксама прыцягваць увагу сусветнай супольнасці да найбольш вострых праблем краіны: рэфармавання аховы здароўя і пераадолення наступстваў катастрофы на ЧАЭС.

У нацыянальнай стратэгіі сацыяльна-эканамічнага развіцця Рэспублікі Беларусь на перыяд да 2020 года вызначана, што “стратэгічнай мэтай у галіне паляпшэння здароўя з’яўляецца стварэнне дзяржаўнага механізму падтрымкі здаровага ладу жыцця, фарміраванне высокага попыту на асабістае здароўе, стварэнне перадумоў для яго задавальнення”. Асноўная задача нашай дзяржавы ў гэтым кірунку – стварэнне ў сваіх грамадзян усвядомленай патрэбнасці ставіцца да свайго здароўя як да каштоўнасці.

Дзяржава робіць усё неабходнае для захавання здароўя сваіх грамадзян. Але цяпер усё больш відавочнай становіцца залежнасць здароўя не толькі ад лячэбна-прафілактычных мерапрыемстваў, якія праводзяцца ўстановамі аховы здароўя, але перш за ўсё ад самога чалавека, ад яго ўсвядомленага стаўлення да фарміравання, умацавання і захавання свайго здароўя і здароўя членаў сваёй сям’і.

Сусветны дзень здароўя закліканы фарміраваць у людзей правільнае ўяўленне пра здаровае жыццё, пра найвышэйшую каштоўнасць здароўя, пра неабходнасць займацца фізічнымі практыкаваннямі, удзельнічаць у актыўных відах адпачынку, ужываць здаровую ежу, абмяжоўваць спажыванне алкаголю і тытуню і г.д.

На выстаўцы прадстаўлена звыш 100 дакументаў: кнігі, брашуры і перыядычныя выданні на рускай, французскай і англійскай мовах.

Экспазіцыя змяшчае наступныя тэматычныя раздзелы:
Міжнародныя рэкамендацыі і стандарты ў галіне аховы здароўя, дзейнасць САЗ.
Ахова здароўя грамадзян у Рэспубліцы Беларусь.
Палітыка ў галіне здаровага ладу жыцця і лекаў.
Здароўе маці і дзіцяці.
Барацьба з інфекцыйнымі хваробамі і ВІЧ/СНІДам.
Вада, санітарыя і гігіена.
Бяспека харчовых прадуктаў.

Выстаўка будзе карыснай спецыялістам у галіне аховы здароўя, медыцынскім работнікам, навуковым супрацоўнікам, выкладчыкам, студэнтам вышэйшых навучальных устаноў, а таксама ўсім, хто цікавіцца праблемамі аховы здароўя і пытаннямі здаровага ладу жыцця.

Спіс літаратуры

Карысныя спасылкі

Здаровы лад жыцця: міжнародны вопыт і стратэгія Беларусі

Інфармацыйныя рэсурсы

Паслугі