З 8 снежня 2008 года па 31 студзеня 2009 года ў Нацыянальнай бібліятэцы Беларусі (3-і паверх, кальцавы калідор) пачне работу выстаўка “Жыццё не па хлусні”, прысвечаная 90-годдзю з дня нараджэння пісьменніка А.І. Салжаніцына (1918 – 2008).
Чалавек не выбірае час, у які яму жыць. Ён даецца чалавеку, і ў адносінах да часу кожны вызначае і выяўляе сябе як асобу. Не ўсякі можа кінуць выклік часу: устаўшы супраць плыні, цяжка вытрымаць яе націск. Але тыя, хто вытрымаў, кінуў вар’яцкі выклік і быў названы сучаснікамі бунтаром, адкрываюцца перад намі сапраўднымі героямі свайго часу. Геройства іх – у сіле духу і маральнай самаадданасці. У тым, што пражылі яны сваё жыццё не па хлусні. Такім і бачыцца сёння жыццёвы і творчы шлях Аляксандра Ісаевіча Салжаніцына – лаўрэата Нобелеўскай прэміі па літаратуры (1970 г.) “за маральную сілу, пачэрпнутую ў традыцыі вялікай рускай літаратуры”.
Нацыянальная бібліятэка Беларусі прапануе ўвазе наведвальнікаў кніжную выстаўку, прысвечаную памяці вялікага рускага пісьменніка і грамадскага дзеяча. У раздзеле “Прызнанне… Забыццё…Лёс” шырока пададзена літаратурна-мастацкая творчасць А.І. Салжаніцына, у тым ліку і замежныя выданні: “У крузе першым”, “Архіпелаг ГУЛАГ”, “Ракавы корпус”, “Чырвонае кола” і інш. Некаторыя з пададзеных дакументаў унікальныя: яны захаваліся ў адзінкавых экземплярах. Напрыклад, нумар часопіса “Новы мір” (1962, № 11), дзе ўпершыню была надрукавана аповесць “Адзін дзень Івана Дзянісавіча”, што прынесла пісьменніку сусветную славу, а таксама першае выданне гэтай аповесці, створанае маскоўскім “Савецкім пісьменнікам” ў 1963 г., якое ў свой час старанна забіралася з бібліятэчных фондаў.
Дадзены раздзел экспазіцыі ўключае некалькі тамоў са Збору твораў А.І. Салжаніцына ў 30-і тамах, які рыхтаваўся да друку пры ўдзеле аўтара. Таксама прадстаўленыя кнігі з серыі “Літаратурная прэмія Аляксандра Салжаніцына” (заснаваная ў 2004 годзе); кнігі з серыі “Даследаванні найноўшай рускай гісторыі”, створаныя на дакументальнай аснове і выдадзеныя пад агульнай рэдакцыяй А.І. Салжаніцына; выданні “Усерасійскай мемуарнай бібліятэкі”, заснаванай пісьменнікам.
У раздзеле “Асоба. Творчасць.Час” сабраны палемічныя эсэ, літаратурна-крытычныя нарысы і даследаванні жыцця і творчасці А.І. Салжаніцына. Прадстаўлены бібліяграфічны паказальнік, падрыхтаваны расійскай Нацыянальнай бібліятэкай, у якім сабраны матэрыялы, што характарызуюць 40 гадоў творчай біяграфіі пісьменніка.
Кантактны тэлефон: 293-28-86.