З 31 студзеня ў бібліятэцы працуе выстава “Жыве паміж намі дудар наш…”, прымеркаваная да 215-годдзя з дня нараджэння вядомага беларускага драматурга, паэта, публіцыста, асветніка, перакладчыка, літаратурнага і грамадскага дзеяча Вінцэнта Дуніна-Марцінкевіча (1808–1884).
Імя выбітнага ўраджэнца Беларусі, які першы глыбока зразумеў, што беларуская літаратура можа ўзнікнуць толькі на глебе духоўнага жыцця роднага народа, вядомае не толькі на Радзіме, але і далёка за яе межамі.
На выставе прадстаўлена каля 70 дакументаў, якія адлюстроўваюць багатую спадчыну В. Дуніна-Марцінкевіча. Паказаны зборы твораў, публіцыстыка і лісты, літаратурна-біяграфічныя партрэты. Наведвальнікі ўбачаць выданні яго твораў 1855–1865-х гг. з фондаў Нацыянальнай бібліятэкі Беларусі.
Першы раздзел экспазіцыі асвятляе асноўныя этапы дзейнасці класіка беларускай літаратуры праз выданні, якія распавядаюць аб яго творчай спадчыне ў нацыянальным і еўрапейскім кантэкстах. Тут прадстаўлены работы вядомых літаратурных крытыкаў, такіх як М. Гарэцкі, І. Навуменка, Г. Кісялёў, А. Мальдзіс, А. Лойка, В. Рагойша і інш.
Асноўнымі экспанатамі на выставе з’яўляюцца арыгінальныя і рэпрынтныя прыжыццёвыя выданні вядомага беларускага пісьменніка, творы на польскай мове, выдадзеныя ў Мінску і Вільні ў 1857 і 1861 гг.
У экспазіцыі прадстаўлены сапраўдны рарытэт – паэма “Гапон” (Мінск, 1855) – першы твор В. Дуніна-Марцінкевіча, створаны цалкам на беларускай мове.
У ліку адметнасцей выстаўкі – арыгінальнае выданне вершаванага гістарычнага апавядання “Люцынка, або Шведы на Літве” (1861), дзе апаэтызаваны мужнасць і гераізм продкаў сучасных беларусаў. Гэта апошні твор пісьменніка, выдадзены пры яго жыцці.
Таксама сярод цікавых экспанатаў – пераклад паэмы А. Міцкевіча “Пан Тадэвуш”, зроблены В. Дунінам-Марцінкевічам. Экспануецца рэпрынтнае выданне экзэмпляра 1859 г. і арыгінальнае 1908 г.
Выстава дазваляе бліжэй пазнаёміцца з творчасцю класіка беларускай літаратуры, атрымаць паўнавартаснае ўяўленне аб унёску В. Дуніна-Марцінкевіча ў развіццё беларускай літаратуры і беларускага тэатра.
Экспазіцыя размешчана ў кальцавой галерэі 2-га паверха да 12 сакавіка 2023 г.
Дата заканчэння яе працы можа быць зменена.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 29 80.
Глядзіце таксама рэпартаж тэлеканала "Беларусь 1".
Матэрыял пададзены аддзелам галерэйна-выставачнай дзейнасці.