Дзе заканчваецца кітайскае мастацтва і пачынаецца беларускае? Дзіўна, але адказаць на гэтае пытанне першым наведвальнікам выставачнага праекта "Традыцыі сустракаюцца" аказалася не так проста.
Ва ўрачыстым адкрыцці экспазіцыі прынялі ўдзел дырэктар Нацыянальнай бібліятэкі Беларусі Раман Матульскі, першы сакратар Пасольства Кітайскай Народнай Рэспублікі ў Рэспубліцы Беларусь Чжан Хунвэй, дырэктар Рэспубліканскага інстытута кітаязнаўства імя Канфуцыя БДУ Анатолій Тозік, намеснік генеральнага дырэктара Кітайскай народнай асацыяцыі дружбы з замежнымі краінамі Цзі Вэй, старшыня Беларускага саюза майстроў народнай творчасці Яўген Сахута.
Наведвальнікаў здзівіць падабенства вырабаў майстроў беларускай выцінанкі і кітайскіх рэзчыкаў з паперы. На выстаўцы ў кожнага будзе магчымасць параўнаць традыцыі мастацтва дзвюх краін. Міфічныя істоты, расліны, жывёлы – усё гэта пераклікаецца ў працах майстроў, паміж радзімамі якіх каля 6 тысяч кіламетраў.
Гасцей мерапрыемства чакалі майстар-класы. Іх азнаёмілі з асновамі кітайскіх рамёстваў выразання з паперы і вырабу традыцыйных ліхтарыкаў, а таксама сакрэтамі стварэння беларускай выцінанкі.
Праект падрыхтаваны Нацыянальнай бібліятэкай Беларусі і аддзелам па абмене культурнымі сувязямі Кітайскай народнай асацыяцыі сяброўства з замежнымі краінамі.
Матэрыял прадастаўлены аддзелам сувязей з грамадскасцю.