29 кастрычніка ў Нацыянальнай бібліятэцы Беларусі з нагоды 75-гадовага юбілею Беларускай дзяржаўнай акадэміі мастацтваў адкрылася выстаўка “Шрыфт: litera in primo”.
На мерапрыемстве выступілі намеснік генеральнага дырэктара Нацыянальнай бібліятэкі Беларусі Аляксандр Суша, дэкан факультэта дызайну і дэкаратыўна-прыкладнога мастацтва Беларускай дзяржаўнай акадэміі мастацтваў Усевалад Свентахоўскі, студэнткі Беларускай дзяржаўнай акадэміі мастацтваў Кацярына Прэдко і Анастасія Самсонава.
У экспазіцыі прадстаўлены работы студэнтаў акадэміі мастацтваў і яе выкладчыкаў. Графічныя лісты – вынік практык, эксперыментаў па рэканструкцыі і стварэнні новых шрыфтавых напісанняў на падставе ўзораў і прыкладаў вокладак кніг – ад Францыска Скарыны да беларускіх друкаваных выданняў 1918–1939 гг.
Аўтары абыгрываюць гістарычныя формы шрыфтоў пры захаванні характэрных асаблівасцей першаснага выдання, распрацоўваюць знакі, якія адсутнічаюць у тытульных і тэкставых арыгіналах, перадаюць дэкаратыўнасць, мастацкасць, творчы вопыт аўтараў-афарміцеляў. Лічбавыя і рукапісныя кампазіцыі напісанняў, прадстаўленыя ў экспазіцыі, нясуць годны ўклад у беларускую кніжную шрыфтавую культуру.
Натхнілі мастакоў на захапляльныя віражы ў напісаннях выданні з фонда Нацыянальнай бібліятэкі Беларусі. Падчас урачыстага адкрыцця можна было ўбачыць першасныя шрыфтавыя кампазіцыі.
Спалучэнне літар, перш за ўсё, прызвана даносіць інфармацыю. Сэнсавая, мастацкая, сімвалічная роля буквіцы (ініцыяла, першай літары главы) добра вядома даследчакам і аматарам. Шрыфт таксама можа стаць паведамленнем, успамінам, інфармацыяй і, больш за тое, – творам мастацтва.
Выстаўка будзе доўжыцца да 20 сакавіка 2021 г.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефоны для даведак: (8 017) 266 37 37, 293 28 33.
E-mail: pr@nlb.by
Глядзіце таксама рэпартаж тэлеканала "Беларусь 1" пра выставу.
Матэрыял пададзены аддзелам сувязей с грамадкасцю.