21 кастрычніка ў Нацыянальнай бібліятэцы Беларусі адбылося ўрачыстае адкрыццё III Міжнароднага кангрэса “Бібліятэка як феномен культуры”.
Адкрыў кангрэс дырэктар бібліятэкі Раман Матульскі. З прывітальнымі словамі да ўдзельнікаў звярнуліся міністр культуры Рэспублікі Беларусь Барыс Святлоў, намеснік старшыні Пастаяннай камісіі па адукацыі, культуры і навуцы Палаты прадстаўнікоў Нацыянальнага сходу Наталля Кучынская, дырэктар Нацыянальнага цэнтра прававой інфармацыі Яўген Каваленка, епіскап Барысаўскі і Мар’інагорскі Веніямін.
У рамках адкрыцця адбылася цырымонія ўзнагароджання пераможцаў I Рэспубліканскага конкурсу “Бібліятэка – цэнтр духоўна-маральнай асветы і выхавання”, заснавальнікам якога з’яўляецца Беларускі экзархат.
На пленарным пасяджэнні ўзнімаліся пытанні развіцця публічных бібліятэк у гістарычным ракурсе, разглядаліся асноўныя вектары дзяржаўнай палітыкі ў галіне бібліятэчнай справы ў кантэксце рэалізацыі дзяржаўных праграм, аналізавалася роля бібліятэк у падтрымцы і развіцці чытання, прапаноўваліся шляхі развіцця бібліятэк у сучасную эпоху.
Пачала сваю работу выставачная пляцоўка, на якой удзельнікі кангрэса могуць пазнаёміцца з тэхнічнымі і тэхналагічнымі інавацыямі, інфармацыйнымі прадуктамі і паслугамі, набыць выдавецкую і сувенірную прадукцыю.Пасля пленарнага пасяджэння работа кангрэса прайшла ў фармаце секцыйных пасяджэнняў, семінараў і круглых сталоў, частка якіх прадоўжыць сваю работу заўтра.
Першы дзень мерапрыемства завяршыўся экскурсійнай праграмай па Нацыянальнай бібліятэцы Беларусі.