У дар Нацыянальнай бібліятэцы Беларусі перададзены кнігі, прадстаўленыя ў рамках 8-й Міжнароднай канферэнцыі “PICARD”, якая прайшла 18–20 верасня ў Санкт-Пецярбургу пад эгідай Сусветнай мытнай арганізацыі.
Падручнік “Таможенное регулирование в Таможенном союзе в рамках ЕврАзЭС” перадаў у дар адзін з яго аўтараў, дырэктар Паўночна-Заходняга інстытута кіравання РАНГіДС, доктар эканамічных навук, кандыдат гістарычных навук, прафесар Уладзімір Шамахаў.
8-я Міжнародная канферэнцыя “PICARD” упершыню праводзілася ў Расіі і сабрала рэкордную колькасць удзельнікаў з 75 краін. Дэлегацыя Беларусі складалася з прадстаўнікоў Дзяржаўнага мытнага камітэта і Міжнароднага ўніверсітэта “МІПСА”.
Галоўнай мэтай праграмы Сусветнай мытнай арганізацыі “PICARD” з’яўляецца стварэнне платформы, дзе зацікаўленыя бакі маглі б супрацоўнічаць з мэтай правядзення даследаванняў і павышэння прафесіяналізму ў сферы мытнай дзейнасці. Сумесна з Міжнароднай сеткай мытных універсітэтаў (The International Network of Customs Universities (INCU)) удзельнікамі праграмы распрацаваны прафесійныя стандарты для стварэння адукацыйных праграм, падрыхтоўкі кадраў мытных служб узроўню ВА (Bachelor of Arts) і МВА (Master of Business Administration). На сённяшні дзень вядуцца перагаворы аб далучэнні да партнёраў INCU Міжнароднага ўніверсітэта “МІПСА”.
Міжнародны ўніверсітэт “МІПСА” на канферэнцыі прадстаўляў дацэнт кафедры адвакатуры юрыдычнага факультэта, даследчык і аўтар навуковых работ у сферы міжнароднага мытнага права, магістр юрыдычных навук Аляксандр Грабеннікаў. Яго кніга “Всемирная таможенная организация в международном таможенном праве”, раней перададзеная ў дар Нацыянальнай бібліятэцы Беларусі, была адзначана ў выступленні начальніка ўпраўлення па даследаваннях Сусветнай мытнай арганізацыі спадара Роберта Айрланда.
 |
 |
 |
