3 верасня ў бібліятэцы адбылася цырымонія перадачы ў дар 100 экзэмпляраў кнігі “Финансовая грамотность”.
Кніга з’яўляецца акадэмічным дапаможнікам па асабістых фінансах. У лёгкай і нязмушанай манеры аўтары кнігі Аляксей Гараеў, прафесар, дырэктар праграмы “Майстар фінансаў” Расійскай эканамічнай школы, і Валерый Чумачэнка, судырэктар праграмы “Фінансавая грамата”, расказваюць пра тое, як паспяхова распараджацца асабістым бюджэтам, якія інструменты інвеставання можна выкарыстаць для аховы і прымнажэння зберажэнняў.
Беларуская рэдакцыя кнігі выйшла з друку ў 2015 годзе. Лакалізаваная версія выдання ўлічвае асаблівасці беларускага заканадаўства ў сферы рэгулявання фінансаў, беларускага фінансавага рынку, яго традыцый.
Перадача кнігі “Финансовая грамотность” прайшла ва ўрачыстай абстаноўцы. З прывітальным словам выступіў Аляксандр Кучынскі, намеснік старшыні Асацыяцыі беларускіх банкаў. Ён расказаў пра гісторыю выдання кнігі: «“Финансовая грамотность” выдадзена кампаніяй Visa ў супрацоўніцтве з Нацыянальным банкам Рэспублікі Беларусь, Асацыяцыяй беларускіх банкаў, Палескім дзяржаўным універсітэтам. Кніга шырока прэзентавана ў маі гэтага года. Частка тыражу перададзена ў Нацыянальны банк, частка – Беларускаму рэспубліканскаму саюзу моладзі, а сёння мы рады правесці цырымонію перадачы кнігі ў дар Нацыянальнай бібліятэцы Беларусі».
Намеснік дырэктара Нацыянальнай бібліятэкі Беларусі па інфармацыйных рэсурсах Таццяна Кузьмініч выказала словы падзякі: “З’яўленне кнігі такой накіраванасці вельмі важна і істотна для нас. Дзякую за ініцыятыву, хачу паведаміць, што большая частка экзэмпляраў будзе перададзена ў іншыя бібліятэкі краіны, і гэта паспрыяе павышэнню ўзроўню граматнасці насельніцтва ў сферы эканомікі”.
Кніга “Финансовая грамотность” стваралася з мэтай павышэння ведаў студэнтаў і дарослых у галіне асабістых фінансаў. Выданне раскрывае такія актуальныя тэмы, як кіраванне асабістымі фінансамі, планаванне бюджэту, пытанні накаплення зберажэнняў, крэдытавання, страхавання і многія іншыя.
Мерапрыемства прайшло ў фармаце прэс-канферэнцыі. Намеснік старшыні Асацыяцыі беларускіх банкаў Аляксандр Кучынскі, прадстаўнік Нацыянальнага банка Рэспублікі Беларусь Аляксандр Сотнікаў, а таксама рэгіянальны менеджар кампаніі Visa ў Рэспубліцы Беларусь Ігар Кавалёў адказалі на пытанні гасцей.
Тэлефоны для даведак: (8 017) 293 27 56, 293 28 33.