12 красавіка а 16-й гадзіне ў галерэі “Атрыум” (3-ці паверх) адбудзецца адкрыццё фотадакументальнай выстаўкі “Беларуска-італьянскія культурныя сувязі ў гісторыі і сучаснасці”.
Выстаўка прысвечана 25-годдзю дыпламатычных зносін паміж Італьянскай Рэспублікай і Рэспублікай Беларусь і пройдзе ў межах Года італьянскай культуры ў Беларусі. Экспазіцыя адлюструе багатую гісторыю і шматграннасць беларуска-італьянскіх культурных узаемаадносін. Фотаздымкі, паштоўкі, лісты, артыкулы і многае іншае, а таксама толькі дакладныя гістарычныя факты – усё пра тое, як адбывалася ўзаемапранікненне і ўзбагачэнне культур, як складвалася дружба сонечнай Італіі і сінявокай Беларусі.
Упершыню ў адкрытым праглядзе – арыгінальныя дакументы з афіцыйных архіваў Міністэрства замежных спраў і міжнароднага супрацоўніцтва Італьянскай Рэспублікі, Міністэрства замежных спраў Рэспублікі Беларусь і Беларускага тэлеграфнага агенцтва БелТА. Асобнае месца будзе адведзена прыватнаму архіву першага міністра замежных спраў Рэспублікі Беларусь Пятра Краўчанкі.
Беларуска-італьянскія сувязі ў сферы культуры, навукі і рэлігіі будуць прадстаўлены разнастайнымі дакументамі з фондаў Беларускага дзяржаўнага архіва-музея літаратуры і мастацтва – фотаздымкамі, асабістымі дакументамі беларускіх оперных спевакоў, перакладамі вершаў з італьянскай мовы, падарожнымі нататкамі беларускіх паэтаў і інш.
Нацыянальная бібліятэка Беларусі падрыхтуе кніжную экспазіцыю, прысвечаную славутым гістарычным асобам, чый лёс быў звязаны з гісторыяй дзвюх краін. Пра дзейнасць першадрукара Францыска Скарыны наведвальнікам раскажуць грунтоўны навуковы зборнік “Франциск Скорина − белорусский гуманист, просветитель, первопечатник”, эксклюзіўнае факсіміле “Кніжная спадчына Францыска Скарыны” і іншыя выданні. Цэнтрам экспазіцыі стане ўнікальная кніга “Песня пра постаць, дзікі нораў зубра і паляванне на яго” Міколы Гусоўскага, выдадзеная ў Італіі, з 13 афортамі вядомага беларускага мастака Ю. Якавенкі і аўтэнтычным тэкстам на лацінскай мове.
Пазнаёміцца з экспазіцыяй можна да 16 мая 2017 года.
Дата заканчэння работы выстаўкі можа быць зменена.
Тэлефоны для даведак: (8 017) 293 27 56, 293 79 80, 266 37 37.
Е-mail: pr@nlb.by
