22 лютага ў Нацыянальнай бібліятэцы адбыўся семінар, прысвечаны электронна-бібліятэчнай сістэме “БиблиоРоссика”.
“БиблиоРоссика” – гэта паўнатэкставая база, якая пастаянна папаўняецца і змяшчае больш за 20 000 выданняў, аб’яднаных у базавыя, спецыяльныя, англамоўныя і выдавецкія калекцыі. У іх прадстаўлены кнігі па прыродазнаўчых навуках, журналістыцы, ахове здароўя, гісторыі, культуры і мастацтве, міжнародных адносінах, адукацыі і педагогіцы, сельскай і лясной гаспадарцы, тэхнічных навуках, філалогіі, эканоміцы і інш. Асаблівую каштоўнасць рэсурсу складаюць рэдкія і малатыражныя выданні расійскіх рэгіянальных ВНУ.
Сустрэча прайшла ў змешаным фармаце: аддалена да семінара змаглі падключыцца розныя бібліятэкі нашай краіны, а ў вочным – супрацоўнікі Нацыянальнай бібліятэкі. Усяго семінар сабраў прадстаўнікоў больш як 30 бібліятэк, устаноў вышэйшай, прафесійна-тэхнічнай і сярэдняй спецыяльнай адукацыі з усіх рэгіёнаў Беларусі.
З прывітальным словам да ўдзельнікаў мерапрыемства звярнуўся намеснік генеральнага дырэктара Нацыянальнай бібліятэкі Беларусі Віктар Пшыбытка. Мадэратарам семінара выступіла Ала Шарамецьева, начальнік інфармацыйнага цэнтра.
Запрошаным спікерам семінара стала прадстаўнік кампаніі “БиблиоРоссика” Наталля Юрчанка, якая пазнаёміла ўдзельнікаў з аднайменным рэсурсам і распавяла аб яго асаблівасцях. Падчас мерапрыемства Наталля прэзентавала новыя калекцыі на платформе, якія адказваюць сучасным інтарэсам чытачоў: “Толькі спакой!”, “Як уладкаваны свет”, “Новая класіка”, “Кароткае чытанне” і інш. Таксама быў прадстаўлены агляд сэрвісаў і мабільнай праграмы электронна-бібліятэчнай сістэмы.
Нагадваем, што доступ да электронна-бібліятэчнай сістэмы “БиблиоРоссика” адкрыты для ўсіх зарэгістраваных карыстальнікаў Нацыянальнай бібліятэкі Беларусі.
Віртуальная чытальная зала адкрыта для супрацоўніцтва з усімі бібліятэкамі і інфармацыйнымі цэнтрамі нашай краіны па пытаннях падключэння да ЭБС “БиблиоРоссика” і іншых ліцэнзійных баз даных.
Рады супрацоўніцтву!
Матэрыял пададзены аддзелам карпаратыўнага ўзаемадзеяння.
