23 красавіка ў рамках мерапрыемстваў, прымеркаваных да Сусветнага дня кніг і аўтарскага права, у Нацыянальнай бібліятэцы Беларусі ладзілася пасяджэнне круглага стала на тэму этыкі і права інтэлектуальнай уласнасці
Арганізатарамі круглага стала "Этыка і права інтэлектуальнай уласнасці ў сферы доступу да інфармацыі, у захаванні культурнай і духоўнай спадчыны грамадства" выступілі Савет бібліятэк Беларусі па інфармацыйным узаемадзеянні, Нацыянальная бібліятэка Беларусі і Нацыянальны цэнтр інтэлектуальнай уласнасці.
Круглы стол праводзіўся з мэтай прыцягнення ўвагі дзяржаўных і грамадскіх інстытутаў да этычных і прававых аспектаў выкарыстання аб’ектаў інтэлектуальнай уласнасці ў сферы забеспячэння доступу да інфармацыі, захаванні культурнай і духоўнай спадчыны.
Падчас работы круглага стала абмяркоўваліся наступныя пытанні: уплыў абмежаванняў вольнага выкарыстання аб’ектаў інтэлектуальнай уласнасці на развіццё культуры і фарміраванне грамадскага здабытку; праблемы захавання алічбаванай культурнай спадчыны ў інфармацыйным грамадстве; этыка-прававыя аспекты альтэрнатыўных ліцэнзій; заканадаўчыя ініцыятывы бібліятэчнай грамадскасці ў галіне аўтарскага права і сумежных праў.
У мерапрыемстве бралі ўдзел прадстаўнікі заканадаўчай улады Рэспублікі Беларусь, ЮНЕСКА, Міністэрства культуры Рэспублікі Беларусь, Нацыянальнага цэнтра інтэлектуальнай уласнасці, БДУ, Інстытута тэалогіі імя святых Мяфодзія і Кірыла БДУ, Нацыянальнай бібліятэкі Беларусі, кіраўнікі і спецыялісты бібліятэк рознага ведамаснага падначалення, кіраўнікі і прадстаўнікі грамадскіх арганізацый сферы навукі і творчасці.
У рамках работы круглага стала была арганізавана выстаўка выданняў Нацыянальнага цэнтра інтэлектуальнай уласнасці. Удзельнікі мерапрыемства змаглі азнаёміцца з кніжнай выстаўкай Нацыянальнай бібліятэкі Беларусі "Інтэлектуальная ўласнасць: ахова і развіццё ў свеце", прымеркаванай да Міжнароднага дня інтэлектуальнай уласнасці.