24 лютага ў галерэі "Ракурс" Нацыянальнай бібліятэкі Беларусі адбылося ўрачыстае адкрыццё выстаўкі жывапісу Фёдара Ястраба "Формула міфа" і прэзентацыя яго новай кнігі "Мастацтва ў сацыяльнай прасторы".
Фёдар Ястраб – вядомы галерыст, жывапісец, мастацтвазнавец і куратар звыш 80 маштабных праектаў. Сярод іх выстаўкі, якія атрымалі шырокі рэзананс у мастацкім жыцці краіны, – Міжнародны фестываль лічбавага мастацтва "Terra Nova", Міжнародная біенале сучаснага жывапісу "Colorfest", Міжнародная выстаўка графікі "Арт-лінія" і інш.
Мастак завяршыў вялікі цыкл работ "Формула міфа", дзе паспрабаваў даць сучасную інтэрпрэтацыю, па-новаму асэнсаваць багаты міфалагічны матэрыял, у тым ліку беларускі. Створаны мастаком міф набывае характар гіпертэксту, пашырае межы тлумачэння адной тэмы. Гэта цэлы свет, насычаны вобразнай і сэнсавай атмасферай, шырокай палітрай колераў і адценняў.
Фёдар Ястраб як мастацтвазнавец часта выступае ў друку па праблемах выяўленчага мастацтва і галерэйнага справы. Ён з’яўляецца аўтарам альбомаў "I Міжнародны фестываль пейзажа" і "В. Дунін-Марцінкевіч", якія атрымалі дыпломы I ступені ў Нацыянальным конкурсе "Мастацтва кнігі – 2008".
Сёлета выйшла кніга "Мастацтва ў сацыяльнай прасторы", якую аўтар прэзентаваў на вернісажы. У кнізе разглядаюцца пытанні развіцця арт-рынка, праблемы галерэйнай справы і ў цэлым развіцця мастацкага жыцця Беларусі.
Адкрыў вернісаж дырэктар Нацыянальнай бібліятэкі Беларусі Раман Матульскі. У мерапрыемстве ўзялі ўдзел намеснік міністра інфармацыі Рэспублікі Беларусь Ігар Лапцёнак; генеральны дырэктар ААТ "Беларускі народны банк" Канстанцін Цэрэтэли; дэкан факультэта культуралогіі і сацыякультурнай дзейнасці Беларускага дзяржаўнага ўніверсітэта культуры і мастацтваў Мікалай Каралёў; доктар мастацтвазнаўства, прафесар Беларускага дзяржаўнага ўніверсітэта культуры і мастацтваў Рыгор Шаўра; доктар мастацтвазнаўства, прафесар, старшыня ГА "Беларускі саюз майстроў народнай творчасці" Яўген Сахута; дацэнт Беларускай дзяржаўнай акадэміі мастацтва, мастацтвазнавец Яўген Шунейка.
Выстаўка будзе доўжыцца ў галерэі “Ракурс” да 19 красавіка 2011 г.