Да ўвагі гісторыкаў, бібліяграфазнаўцаў, студэнтаў і аспірантаў профільных адукацыйных устаноў.
У выдавецтве Нацыянальнай бібліятэкі Беларусі пабачыла свет манаграфія “Гісторыя беларускай нацыянальнай бібліяграфіі. 1921–2021”. Выданне з’яўляецца вынікам плённай навуковай дзейнасці Таццяны Васільеўны Кузьмініч, кандыдата педагагічных навук, дацэнта, аўтара навуковых, вучэбных і метадычных прац па тэорыі і гісторыі беларускай бібліяграфіі, фарміраванні бібліятэчных фондаў, стварэнні інфармацыйнай прадукцыі, інфармацыйнай культуры асобы.
Грунтоўная навуковая праца ў комплексе дэманструе розныя аспекты развіцця беларускай нацыянальнай бібліяграфіі на працягу апошняга стагоддзя. У даследаванні даюцца характарыстыкі найбольш значных бібліяграфічных крыніц і рэалізаваных метадычных падыходаў, аналізуюцца вытокі сучаснай нацыянальнай бібліяграфіі, падсумоўваецца яе рэсурсна-бібліяграфічны склад, што дапамагае вызначыць перспектыўныя кірункі развіцця на сучасным этапе.
У выданні аналізуюцца метадалагічныя асновы гісторыі і тэорыі бібліяграфіі, прапаноўваецца новы падыход да разгляду нацыянальнай бібліяграфіі як адзінага ўтварэння, незалежна ад тэрыторыі, на якой ствараліся дакументныя масівы і крыніцы нацыянальнай бібліяграфіі. Бібліяграфічныя з’явы даюцца ў кантэксце гістарычных працэсаў, паказваюцца сучасныя ўласцівасці грамадскага жыцця і звязаныя з імі рэаліі бібліяграфічнай дзейнасці.
Праца складаецца з раздзелаў, якія даюць уяўленне пра сутнасць нацыянальнай бібліяграфіі Беларусі, яе ролю для гісторыка-навуковых даследаванняў, сувязі са спецыяльнымі гістарычнымі дысцыплінамі, паказаны спецыфіка і склад інфармацыйных рэсурсаў, створаных у яе межах на розных этапах развіцця, асаблівасці сучаснай арганізацыйнай структуры і рэсурснага напаўнення. Манаграфія суправаджаецца пералікам бібліяграфічнай прадукцыі, створанай суб’ектамі беларускай нацыянальнай бібліяграфіі за стагадовы перыяд яе гісторыі.
Даследаванне спрыяе фарміраванню новых навуковых ведаў у межах айчыннага бібліяграфазнаўства, навукова-інфармацыйнаму забеспячэнню адукацыйнай практыкі. Выданне будзе карысным не толькі для спецыялістаў бібліятэчна-інфармацыйнай сферы, але і для ўсіх, хто цікавіцца гісторыяй беларускай нацыянальнай бібліяграфіі.
Матэрыял пададзены навукова-даследчым аддзелам бібліяграфіі.