27 сакавіка 2009 года ў зале адукацыйных тэхналогій Нацыянальнай бібліятэкі Беларусі прайшоў Міжнародны семінар для кіруючага персаналу міністэрстваў і ведамстваў па тэхналагічным прадбачанні для Рэспублікі Беларусь.
Семінар быў прысвечаны аналізу сусветнага вопыту фарсайтных даследаванняў, а таксама спецыфіцы прымянення гэтых падыходаў у Беларусі.
У рабоце семінара прынялі ўдзел прадстаўнікі Дзяржаўнага камітэта па навуцы і тэхналогіях Рэспублікі Беларусь, Нацыянальнай акадэміі навук Беларусі, Нацыянальнай бібліятэкі Беларусі, Рэспубліканскага цэнтра трансферу тэхналогій, Інстытута эканомікі НАН Беларусі, а таксама прадстаўнікі галіновых міністэрстваў і аблвыканкамаў, якія курыруюць работы па тэхналагічным прадбачанні і ўдзельнічаюць у распрацоўцы комплекснага прагнозу навукова-тэхнічнага прагрэсу Рэспублікі Беларусь на 2011-2030 гг.
З прывітальным словам да ўдзельнікаў семінара звярнуўся дырэктар Нацыянальнай бібліятэкі Беларусі Матульскі Раман Сцяпанавіч.
Пра тэхналагічнае прадбачанне як інструмент інтэграцыі Рэспублікі Беларусь ў сусветную супольнасць расказаў першы намеснік старшыні прэзідыума НАН Беларусі Віцязь Пётр Аляксандравіч. З расійскім вопытам правядзення даследаванняў па дадзенай тэме прысутных пазнаёміў Сакалоў Аляксандр Васільевіч, дырэктар Фарсайт-цэнтра ДУ “Вышэйшая школа эканомікі”.
У канцы семінара адбылася дыскусія, у ходзе якой удзельнікі абмяняліся думкамі, абмеркавалі прынцыпы далейшага ўзаемадзеяння і супрацоўніцтва. Вынікі семінара дазволяць сфарміраваць узгодненае бачанне тэхналагічнай будучыні нашай рэспублікі, што ў канчатковым выніку будзе спрыяць канкурэнтаздольнасці нацыянальнай эканомікі.