У ЗША адбылася нарада ўдзельнікаў праекта “Сусветная лічбавая бібліятэка” (СЛБ) і канферэнцыя Амерыканскай бібліятэчнай асацыяцыі (ALA), дзе Нацыянальную бібліятэку Беларусі прадстаўляў яе дырэктар Р.С. Матульскі.
У рабоце форума Сусветнай лічбавай бібліятэкі, які праходзіў 21–23 чэрвеня ў Бібліятэцы Кангрэса ЗША, узялі ўдзел кіраўнікі бібліятэк, інфармацыйных службаў і навуковых устаноў, якія з’яўляюцца заснавальнікамі і патэнцыяльнымі партнёрамі праекта па стварэнні СЛБ ва ўсіх рэгіёнах свету – каля 100 прадстаўнікоў з 84 арганізацый, а таксама прадстаўнікі ЮНЕСКА і ІФЛА.
У ходзе пасяджэння былі заслуханы даклады кіраўнікоў СЛБ, прысвечаныя фарміраванню кантэнту і арганізацыйна-тэхнічнаму забеспячэнню бібліятэкі. Асноўны даклад прадставіў дырэктар СЛБ Джон Ван Оўдэнарэн, у якім была дадзена характарыстыка сучаснага стану Сусветнай лічбавай бібліятэкі, рэсурсаў рэгіёна ў СЛБ, асаблівасцей работы з партнёрамі бібліятэкі ў розных рэгіёнах свету. Асобна абмяркоўваліся пытанні арганізацыі працы ў краінах СНД. Асноўная ўвага ў час дыскусіі надавалася крытэрыям адбору кантэнту і тэхнічным магчымасцям бібліятэк.
На спецыяльным пасяджэнні, прысвечаным развіццю праекта ў Еўразіі і краінах СНД было заслухана 20 дакладаў прадстаўнікоў арганізацый – удзельнікаў нарады і праведзена абмеркаванне актуальных праблем па пытаннях планавання работы СЛБ з бібліятэкамі і іншымі ўстановамі рэгіёна.
Ад Беларусі ў рабоце форума ўзяў удзел дырэктар Нацыянальнай бібліятэкі Беларусі Р.С. Матульскі. На пасяджэнні ён выступіў з прэзентацыяй “Нацыянальная бібліятэка Беларусі – партнёр Сусветнай лічбавай бібліятэкі”, у якой прадставіў галоўную бібліятэку краіны і работу, што праводзіцца ёю ў праекце СЛБ; была дадзена характарыстыка калекцыі Нацыянальнай бібліятэкі Беларусі і прадстаўлена бачанне далейшага развіцця праекта і ўдзелу ў ім бібліятэк Беларусі. Кіраўніцтвам СЛБ была высока ацэнена кваліфікацыя персаналу і арганізацыя работы Нацыянальнай бібліятэкі Беларусі па прадстаўленні матэрыялаў у СЛБ. Па выніках работы ўдзельнікі пасяджэння выпрацавалі агульную пазіцыю для прадстаўлення інтарэсаў бібліятэк рэгіёна на пасяджэнні СЛБ.
Таксама Р.С. Матульскі прымаў удзел у рабоце штогадовай канферэнцыі Амерыканскай бібліятэчнай асацыяцыі (The American Library Association), якая адбылася 26–28 чэрвеня ў г. Вашынгтоне. ALA падтрымлівае бібліятэкі і бібліятэчную прафесійную адукацыю не толькі ў ЗША, але і ва ўсім свеце. У яе склад уваходзяць каля 66 000 членаў. Асацыяцыя была заснавана ў 1876 г. у Філадэльфіі з мэтай падтрымкі, развіцця і ўдасканалення бібліятэчнага і інфармацыйнага абслугоўвання, павышэння якасці бібліятэчнай адукацыі і забеспячэння доступу да інфармацыі для ўсіх. Цяперашні стратэгічны план АLA змяшчае заклік прадаўжаць работу ў галіне прапаганды і значэння прафесіі, адукацыі, удасканальвання дзяржаўнай палітыкі ў сферы бібліятэчнай справы.
Асацыяцыя штогод праводзіць самую буйную ў свеце бібліятэчную канферэнцыю і выстаўку. Сёлета ў канферэнцыі ўзяло ўдзел каля 13 тыс. бібліятэкараў, настаўнікаў, пісьменнікаў, прадстаўнікоў выдавецтваў і г.д. Падчас канферэнцыі прайшла спецыялізаваная выстаўка і больш за 2 000 семінараў і круглых сталоў, на якіх закраналіся розныя аспекты дзейнасці бібліятэк, у т.л. укараненне інавацый у сістэму бібліятэчнага абслугоўвання і стварэнне электронных бібліятэк.