З 1 па 27 ліпеня ў зале беларускай літаратуры (пам. 205) праходзіць юбілейная выстаўка “Руплівы даследчык” да 80-годдзя беларускага літаратуразнаўца, перакладчыка Уладзіміра Лявонцевіча Сакалоўскага.
Сфера навуковых інтарэсаў У.Л. Сакалоўскага – літаратурныя сувязі, распаўсюджванне беларускай літаратуры за мяжой. Вынікам даследаванняў беларуска-нямецкіх культурных сувязей сталі працы “Пара станаўлення. Вопыт параўнальнага вывучэння беларускай і некаторых класічных зарубежных літаратур” (1986), “Беларуская літаратура ў ГДР” (1988), “Беларуская савецкая літаратура за мяжой” (1988, у сааўтарстве) і інш. Адметнае месца ў экспазіцыі займае праца “Надзвычайная місія БНР у Нямеччыне (1919–1925)”, якая надрукавана ў часопісе “ARCHE” (2009, № 3). Гэта – больш за 300 старонак навукова абгрунтаванага матэрыялу, які падмацаваны архіўнымі дакументамі.
Вялікую каштоўнасць як для нямецкіх, так і для беларускіх даследчыкаў мае кніга У.Л. Сакалоўскага “Weißrußland und Deutschland: Geistes – und Kulturbeziehungen zwischen 1914 und 1941. Band 1: Bibliographie”, выдадзеная ў Германіі ў 2000 г.
Уладзімір Лявонцевіч Сакалоўскі – аўтар шэрага навуковых артыкулаў, надрукаваных у Беларусі і за яе межамі. Акрамя навуковай працы, ён займаецца і перакладамі. На беларускую мову пераклаў кнігі А. Цеханавецкага «Міхал Казімір Агінскі і яго “сядзіба музаў” у Слоніме» (1993), В. Мюлера “Вырваны з агню. Гісторыя Пятра Рувінавіча Рабцэвіча з Пінска, выдадзеная і апрацаваная Вернерам Мюлерам” (2002).
Экспазіцыю састаўляюць манаграфіі, пераклады, літаратуразнаўчыя і гістарычныя артыкулы, рэцэнзіі аўтара, змешчаныя ў перыядычных выданнях, а таксама матэрыялы пра жыццёвы і творчы шлях вучонага.
Выстаўка складаецца з двух раздзелаў: “Факты і абагульненні” і “Жыццёвы шлях”. Усяго на ёй прадстаўлена больш за 50 выданняў.
Кантактны тэлефон: 293-27-16.