29 лістапада а 15-й гадзіне ў галерэі “Лабірынт” ладзіцца цырымонія перадачы Прадстаўніцтвам Рассупрацоўніцтва ў Рэспубліцы Беларусь – Расійскім цэнтрам навукі і культуры ў Мінску – выдання “Живая вера. Ветка” бібліятэкам Беларусі.
Дабрачынная акцыя падрыхтавана Нацыянальнай бібліятэкай Беларусі сумесна з Расійскім цэнтрам навукі і культуры ў Мінску і выдавецтвам “Беларуская Энцыклапедыя імя Петруся Броўкі”.
Кніга-фотаальбом “Живая вера. Ветка” серыі “Энцыклапедыя рарытэтаў” раскрывае мастацкую культуру і творчасць унікальнага рэгіёна на паўднёвым усходзе Беларусі – стараверскай Веткі – гістарычнага цэнтра царкоўнага расколу канца XVII – XVIII стагоддзя.
Выданне змяшчае раздзелы, прысвечаныя іканапісу, залачонай разьбе, шыццю, мастацтву златакавалёў і ліццю, а таксама невялікі гістарычны агляд. Тэксты і ілюстрацыі ўнікальнай кнігі адкрываюць жывую сувязь часоў – нашай сучаснасці і старажытнай набожнасці.
У ходзе мерапрыемства адбудзецца перадача кнігі “Живая вера. Ветка” рэспубліканскім, абласным і раённым бібліятэкам Беларусі, а таксама бібліятэкам устаноў адукацыі і культуры.
Тэлефоны для даведак: (8 017) 293 29 80, 293 27 67.
Е-mail: pr@nlb.by