10 лютага ў рамках работы ХХIV Мінскай міжнароднай кніжнай выстаўкі-кірмашу адбылася прэзентацыя электроннай калекцыі “Кніга Беларусі XIV–XVIII стст.”.
Электронны рэсурс змяшчае копіі поўных тэкстаў рэдкіх і старадрукаваных дакументаў з фондаў Нацыянальнай бібліятэкі Беларусі, якія выдадзены ў XIV–XVIII стагоддзях і па тэрытарыяльных, моўных, аўтарскіх ці зместавых прыкметах адносяцца да Беларусі.
Аснову калекцыі складаюць старадрукаваныя кнігі кірылічнага друку, а таксама выданні на польскай, лацінскай і іншых мовах.
У калекцыі бібліятэкі прадстаўлены электронныя копіі выданняў Ф. Скарыны, якія захоўваюцца ў фондах НББ, выданні Віленскай друкарні Васіля Гарабурды, друкарань братоў Мамонічаў, Пятра Мсціслаўца, Васіля і Максіма Вошчанкі і многія іншыя выданні, што прадстаўляюць кніжную спадчыну Беларусі.
Праект “Кніга Беларусі XIV–XVIII стст.” будзе цікавы даследчыкам у галіне кнігазнаўства, гісторыі, педагогікі, супрацоўнікам бібліятэк, архіваў, музеяў, а таксама ўсім, хто цікавіцца гісторыяй і культурай Беларусі.
 |
 |
