30 жніўня ў зале адукацыйных тэхналогій адбылася прэзентацыя ўнікальнага факсімільнага выдання самага ранняга беларускага буквара з усіх, якія захаваліся ў нашай краіне, – віленскага “Буквара” 1767 года.
Мерапрыемства прайшло ў рамках Года кнігі і напярэдадні Дня ведаў.
Пад час прэзентацыі выступілі намеснік міністра культуры Рэспублікі Беларусь Тадэвуш Стружэцкі, намеснік міністра адукацыі Рэспублікі Беларусь Васіль Будкевіч, акадэмік-сакратар аддзялення гуманітарных навук і мастацтваў НАН Беларусі Аляксандр Каваленя, старшыня апякунскага савета Нацыянальнай бібліятэкі Беларусі, кіраўнік Прадстаўніцтва кампаніі XEROX у Рэспубліцы Беларусь Аляксандр Швец, дырэктар Нацыянальнай бібліятэкі Раман Матульскі.
У рамках прэзентацыі адбылася перадача факсімільнага выдання “Буквара” Фундаментальнай бібліятэцы БДУ, Магілёўскай абласной бібліятэцы, Цэнтральнай навуковай бібліятэцы імя Я. Коласа НАН Беларусі. У найбліжэйшы час кнігі паступяць і ў іншыя бібліятэкі краіны.
Выпуск факсімільнага выдання “Буквара” – вынік доўгай сумеснай працы Нацыянальнай бібліятэкі Беларусі і Прадстаўніцтва кампаніі XEROX у Рэспубліцы Беларусь.
Узноўлены “Буквар” – унікальны помнік асветніцкай думкі і духоўнай культуры нашага народа. Факсімільнае выданне “Букварa” падрыхтавана з захаваннем усіх асаблівасцей арыгінала.
 |
 |
 |
