28 кастрычніка ў бібліятэцы адбылася прэзентацыя альбома-каталога “Кніжная спадчына Беларусі”.
Выпуск выдання стаў вынікам сумеснай дзейнасці выдавецтва “Беларуская Энцыклапедыя імя Петруся Броўкі” і Нацыянальнай бібліятэкі Беларусі. Праект быў рэалізаваны да Дня беларускага пісьменства па заказе і пры фінансавай падтрымцы Міністэрства інфармацыі Рэспублікі Беларусь.
“Прэзентацыі кніг выдавецтва «Беларуская Энцыклапедыя імя Петруся Броўкі» ў нашай бібліятэцы сталі ўжо добрай традыцыяй. Калі ўзнікла ідэя стварэння альбома пра кніжную спадчыну Беларусі, было відавочна, што трэба працаваць менавіта з гэтым выдавецтвам. Цяпер мы маем вельмі незвычайнае энцыклапедычнае выданне, скарбніцу, якая ўвабрала ў сябе нашу духоўную спадчыну”, – адзначыў пад час прэзентацыі дырэктар Нацыянальнай бібліятэкі Беларусі Раман Матульскі. Кіраўнік падкрэсліў, што гэты праект – толькі пачатак, пакладзены ў аснову рэалізацыі ідэі па вяртанні кніжнай спадчыны беларускай зямлі шляхам стварэння факсімільных копій рарытэтаў.
“У апошнія гады мы шмат робім для вяртання кніжнай спадчыны. Напярэдадні святкавання 500-годдзя беларускага кнігадрукавання гэтае выданне выглядае надзвычай актуальна”, – сказаў намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша.
Галоўны рэдактар выдавецтва “Беларуская Энцыклапедыя імя Петруся Броўкі” Ларыса Языковіч пазнаёміла гасцей мерапрыемства непасрэдна з самім выданнем – яно выканана на трох мовах (беларускай, рускай і англійскай) і багата высокапрафесійным ілюстрацыйным матэрыялам. Фаліянт змяшчае 416 старонак тэксту, падрыхтаванага супрацоўнікамі Нацыянальнай бібліятэкі Беларусі. Складальнік выдання А.А. Суша, прадмова да кнігі напісана Р.С. Матульскім.
У альбоме ўпершыню ў вялікім аб’ёме прадстаўлены лепшыя ўзоры нацыянальнай кніжнай спадчыны з фондаў Нацыянальнай бібліятэкі Беларусі: рукапісныя і старадрукаваныя кнігі, выданні, прысвечаныя беларускай тэматыцы, рэдкія і каштоўныя кнігі, картаграфічныя і выяўленчыя выданні, а таксама экзэмпляры кніг з вядомых беларускіх кніжных збораў.
Урачыстасць прайшла ў музычным суправаджэнні творчага калектыву БДУ “Тутэйшая шляхта”.
 |
 |
 |
 |
 |
 |
 |
