25 лютага а 16-й гадзіне ў галерэі “Лабірынт” (3-ці паверх) адбудзецца прэзентацыя выдання “Лясному рэху праўду раскажу…” з серыі “Жыццё знакамітых людзей Беларусі”, прысвечанага 100-годдзю з дня нараджэння народнага паэта Беларусі Аркадзя Куляшова.
У кнізе, назвай якой стаў крыху зменены радок паэта, Валянціна Куляшова распавядае пра свайго бацьку – Аркадзя Куляшова. Тут і самыя яркія згадкі з яго маленства, і старонкі яго радаводу, і першае каханне, і шлях у літаратуру, і сяброўства з многімі пісьменнікамі. Аўтар уводзіць чытачоў у яго творчую лабараторыю, паказвае, як нараджалася задума таго ці іншага твора і як яна потым ажыццяўлялася на паперы. Невыпадкова ў кнізе падаецца так многа вершаў і ўрыўкаў з яго паэм.
Аддаць даніну памяці Аркадзю Куляшову на мерапрыемстве збяруцца літаратуразнаўцы, паэты і пісьменнікі. Успамінамі падзеляцца яго родныя і блізкія.
Да 100-годдзя з дня нараджэння беларускага паэта Нацыянальная бібліятэка Беларусі падрыхтавала кніжную выстаўку “Класік беларускай паэзіі”, дзе прадстаўлены зборы твораў Аркадзя Куляшова розных гадоў выдання, творы паэта аўтара ў перакладах на рускую, украінскую, англійскую, літоўскую і іншыя мовы. Выстаўку можна ўбачыць у зале беларускай літаратуры (пам. 205) да 10 сакавіка 2014 г. Частка яе будзе прадстаўлена ў галерэі “Лабірынт” пад час мерапрыемства.
Тэлефон для даведак: (8 017) 293 27 56.
Е-mail: pr@nlb.by