19 лютага ў Нацыянальнай бібліятэцы Беларусі прайшла прэзентацыя электроннага выдання “Не пакідайце ж мовы нашай беларускай...”, падрыхтаванага да 180-годдзя з дня нараджэння Францішка Багушэвіча.
Рэсурс дае магчымасць паглядзець на асобу вядомага пісьменніка, паэта-дэмакрата, публіцыста вачыма мастакоў, пранікнуцца ўвекавечаннем яго памяці, а таксама пачытаць лісты і рукапісы самога паэта з фондаў Дзяржаўнага музея гісторыі беларускай літаратуры, пабачыць здымкі з фондаў музея-сядзібы Францішка Багушэвіча “Кушляны”. У выданне ўвайшлі электронныя копіі першых прыжыццёвых выданняў паэта, сярод якіх “Dudka białaruskaja” 1891 і 1896 гг., вершаваны зборнік “Smyk białaruski” 1894 г., даследаванні жыцця і творчай дзейнасці пісьменніка.
У прэзентацыі ўзялі ўдзел намеснік генеральнага дырэктара Нацыянальнай бібліятэкі Беларусі Аляксандр Суша, дырэктар Дзяржаўнага музея гісторыі беларускай літаратуры Міхаіл Рыбакоў, вядучы бібліёграф інфармацыйна-аналітычнага аддзела Нацыянальнай бібліятэкі Беларусі Юлія Амосава, беларускі мастак, член беларускага саюза мастакоў, уладальнік дыплома і медаля імя Францыска Скарыны Мікалай Купава.
Мерапрыемства ўпрыгожыла выступленне народнага літаратурнага тэатра “Жывое слова”. У канцы госці маглі азнаёміцца з тэматычнай выставай, прысвечанай творчасці Ф. Багушэвіча.
Матэрыял прадастаўлены аддзелам сувязей з грамадскасцю.
Слухайце таксама матэрыял канала "Культура" Беларускага радыё з прэзентацыі выдання.
