22 мая ў рамках форуму “XIX Міжнародныя Кірыла-Мяфодзіеўскія чытанні” Мітрапаліт Філарэт уручыў дырэктару Нацыянальнай бібліятэкі Беларусі Раману Матульскаму ордэн свяціцеля Кірылы Тураўскага ІІ ступені.
Узнагарода ўручана “прымаючы да ўвагі руплівую працу на Славу Царквы Божай і за плённае супрацоўніцтва ў справе папулярызацыі духоўнай літаратуры”.
На адкрыцці канферэнцыі дырэктар Выдавецтва Беларускага экзархата Уладзімір Грозаў правёў прэзентацыю факсімільнай копіі Полацкага Евангелля (XII стагоддзе), якая была падрыхтавана пры ўдзеле Нацыянальнай бібліятэкі Беларусі.
У знак пашаны і ўдзячнасці дырэктар Нацыянальнай бібліятэкі перадаў Патрыяршаму Экзарху лічбавую версію “Минских епархиальных ведомостей” за 1868–1887 гг.
Форум, па традыцыі, арганізуецца Беларускай праваслаўнай царквой, Інстытутам тэалогіі Беларускага дзяржаўнага ўніверсітэта, Міністэрствам адукацыі Рэспублікі Беларусь, Міністэрствам культуры Рэспублікі Беларусь, Беларускім дзяржаўным універсітэтам культуры і мастацтваў.
Мерапрыемства прысвечана Дням славянскай пісьменнасці і культуры.