25 мая адбылася міжнародная навукова-практычная канферэнцыя “Мова як фактар захавання нацыянальнай ідэнтычнасці: беларуска-ўкраінскі кантэкст”.
Мерапрыемства было наладжана Пасольствам Украіны ў Рэспубліцы Беларусь у суарганізацыі з Цэнтрам даследаванняў беларускай культуры, мовы і літаратуры Нацыянальнай акадэміі навук Беларусі, Беларускім дзяржаўным універсітэтам і Нацыянальнай бібліятэкай Беларусі.
На ўрачыстым адкрыцці з прывітальным словам выступілі Ігар Кізім, Надзвычайны і Паўнамоцны Пасол Украіны ў Рэспубліцы Беларусь, і Раман Матульскі, дырэктар Нацыянальнай бібліятэкі Беларусі.
У пленарным пасяджэнні прынялі ўдзел Алена Анісім, дэпутат Палаты прадстаўнікоў Нацыянальнага сходу Рэспублікі Беларусь VI склікання; Алег Трусаў, старшыня Таварыства беларускай мовы імя Францыска Скарыны; Ігар Рынкевіч, каардынатар Рабочай групы Нацыянальнай платформы Форуму грамадзянскай супольнасці Усходняга партнёрства, а таксама кіраўнікі навуковых і культурных устаноў, прадстаўнікі навуковай грамадскасці і сродкаў масавай інфармацыі Беларусі і Украіны.
Удзельнікі пасяджэння абмеркавалі пытанні захавання нацыянальнай мовы як элемента самаідэнтыфікацыі і складніка нацыянальнай бяспекі дзяржавы. Шмат увагі было адведзена і гістарычнаму аспекту: вытокам беларускай і ўкраінскай моў, моўнай сітуацыі ў Вялікім Княстве Літоўскім і інш. Таксама прагучалі даклады, у якіх былі закрануты пытанні сучаснага стану нацыянальнай літаратуры і кніжнай справы абедзвюх краін.
|
|
|
|
|
|
|
|
