22 мая ў бібліятэцы адбылося ўрачыстае адкрыццё XXIII Міжнародных Кірыла-Мяфодзіеўскіх чытанняў, прысвечаных 500-годдзю беларускага і ўсходнеславянскага кнігадрукавання.
Сёлета тэма чытанняў – “Рэлігія і пісьменства як фактары фарміравання славянскай культуры”.
З прывітальным словам да прысутных звярнуўся Высокапраасвяшчэннейшы Павел, Мітрапаліт Мінскі і Заслаўскі, Патрыяршы Экзарх усяе Беларусі. У адкрыцці чытанняў прынялі ўдзел дырэктар Нацыянальнай бібліятэкі Беларусі Раман Матульскі, старшыня Прэзідыума Нацыянальнай акадэміі навук Беларусі Уладзімір Гусакоў, намеснік Упаўнаважанага па справах рэлігій і нацыянальнасцей Алена Радчанка, а таксама прадстаўнікі дыпламатычных місій, замежныя вучоныя, кіраўнікі навуковых і адукацыйных устаноў.
У рамках урачыстай цырымоніі прайшло першае пленарнае пасяджэнне, на якім з дакладам, прысвечаным асобе Францыска Скарыны, выступіў прафесар Мінскай духоўнай акадэміі, протаіерэй Сергій Гардун. Таксама прагучаў даклад дэкана факультэта міжнароднага рэгіёназнаўства і рэгіянальнага кіравання Інстытута дзяржаўнай службы і кіравання РАНГіДС Валянціны Комлевай пра ролю рэлігійных інстытутаў у міжнародным гуманітарным супрацоўніцтве.
Напрыканцы мерапрыемства адбылася канцэртная праграма, прысвечаная адкрыццю XXIII Міжнародных Кірыла-Мяфодзіеўскіх чытанняў.
23 мая работа чытанняў праходзіла ў секцыйным фармаце. Таксама адбыліся другое пленарнае пасяджэнне і круглы стол “Духоўнасць і маральнасць асобы ў міжканфесійным дыялогу” з удзелам замежных гасцей – багасловаў, філосафаў, педагогаў з Расіі, Украіны, Польшчы і Германіі.