Сёння ў розных краінах праходзіць акцыя “Сэлфі ў музеі” (Museum Selfie Day).
Упершыню акцыя прайшла ў 2014 годзе пад лозунгам Нацыянальнага музея ў Кабуле “Нацыя жыве, пакуль жыве культура”. Тады музей прапанаваў інтэрнэт-карыстальнікам зладзіць своеасаблівы флэшмоб, выклаўшы ў сацыяльныя сеткі свае фатаграфіі на фоне музейных экспанатаў.
Слова selfie (ад англ. self – сам) упершыню з’явілася ў 2002 годзе на аўстралійскім форуме як назва здымкаў саміх сябе на смартфоны або фотакамеры і за дзесяць гадоў стала настолькі папулярным, што ў 2013-м было прызнана Оксфардскім слоўнікам англійскай мовы словам года.
Мэта акцыі “Сэлфі ў музеі” – прыцягнуць увагу да музеяў і экспанатаў. Менавіта таму Нацыянальная бібліятэка Беларусі рэкамендуе зарадзіць перад прыходам у музей кнігі (пам. 347) мабільны тэлефон і прыхапіць з сабой палку для сэлфі.
Матэрыял прадастаўлены навукова-даследчым аддзелам кнігазнаўства.
