З 13 верасня па 7 кастрычніка ў кальцавым калідоры 2-га паверха бібліятэкі праходзіць выстаўка “Сучасная бібліятэчная справа: тэорыя і практыка”, прысвечаная Дню бібліятэк (15 верасня).
На працягу стагоддзяў роля і абавязкі бібліятэк заўсёды заставаліся непахіснымі. Бібліятэкі былі практычна манапалістамі ў галіне захавання ведаў і інфармацыі. У сучасным жа інфармацыйным грамадстве ніхто не гарантуе бібліятэкам дастойную ролю ў будучым. Бібліятэкары сваімі ведамі і якасцю прадастаўляемых паслуг заўсёды павінны даказваць сваю карысць грамадству.
Напярэдадні прафесійнага свята для бібліятэкараў краіны гэта пытанне становіцца асабліва актуальным. Вызначыць месца і палажэнне бібліятэк у новым інфармацыйным асяроддзі дапаможа тэматычная кніжная выстаўка, на якой прадстаўлена літаратура пра навейшыя сусветныя інфармацыйныя распрацоўкі, якія прымяняюцца ў бібліятэчнай дзейнасці, айчынным і замежным вопыце ўваходжання бібліятэк у лічбавую эру.
Інфармацыйныя тэхналогіі не толькі ствараюць умовы для канкурэнцыі паміж бібліятэкамі свету і Сусветным павуціннем, але і прадастаўляюць новыя магчымасці для бібліятэчна-бібліяграфічнай дзейнасці. У шэрагу кніг падрабязна апісаны вопыт эфектыўнага кіравання бібліятэкамі пад час сусветнага эканамічнага крызісу, навучання інфармацыйнай культуры карыстальнікаў, выкарыстання Інтэрнэту ва ўсіх бібліятэчных працэсах, пачынаючы з камплектавання і апрацоўкі выданняў да абслугоўвання чытачоў.
Намагаючыся не адставаць ад часу, бібліятэкі актыўна займаюцца алічбоўкай сваіх фондаў, ствараючы “параллельные міры” – электронныя калекцыі фондаў. Першапраходцы шчыра дзеляцца на старонках сваіх манаграфій бачаннем, вопытам, вынікамі практычнай працы віртуальных бібліятэк.
На выстаўцы прадстаўлена каля 200 дакументаў апошніх гадоў выдання на рускай, беларускай, англійскай і нямецкай мовах. Матэрыялы экспазіцыі, несумненна, выклікаюць зацікаўленасць спецыялістаў і будуць карыснымі прадстаўнікам розных кірункаў бібліятэчнай дзейнасці, якія імкнуцца да перманентнай кампетэнтнасці і прафесійнай запатрабаванасці.
Кантактныя тэлефоны: (8 017) 293 29 80, 293 28 86.