11 верасня ў Нацыянальнай бібліятэцы Беларусі прайшоў рэспубліканскі фестываль самадзейнай мастацкай творчасці супрацоўнікаў бібліятэк “Пераўвасабленне”, прымеркаваны да Дня бібліятэк.
Арганізатарамі мерапрыемства выступілі Беларуская бібліятэчная асацыяцыя (ББА) і Нацыянальная бібліятэка Беларусі.
Як адзначыла на адкрыцці фестывалю старшыня ББА і першы намеснік дырэктара Нацыянальнай бібліятэкі Алена Далгаполава, прафесійнае свята работнікі бібліятэк адзначаюць у 13-ты раз, і кожны год у яго гонар бібліятэкары дэманструюць свае таленты. Дагэтуль прэзентуемая творчасць насіла прыкладны характар, але гэтым разам арганізатары вырашылі змяніць традыцыю і “праверыць” работнікаў на артыстычнасць.
Госці фестывалю змаглі ацаніць дзівосную палітру талентаў сваіх калег. Наваяўленыя артысты выконвалі патрыятычныя, рамантычныя і бардавыя песні, некаторыя з іх суправаджаючы ігрой на гітары. Так, сваёй творчасцю парадавалі залу Аліна Чарнаокая, Алена Ставіцкая, (бібліятэкары Цэнтральнай навуковай бібліятэкі імя Я. Коласа НАН Беларусі), Кацярына Малькоўская (нотна-навуковая бібліятэка Беларускай дзяржаўнай акадэміі музыкі), Ірына Стралкова (старшыня камітэта па кадрах ББА), Ала Шалашова (Фундаментальная бібліятэка БДУ), Валянціна Бакуновіч і Наталля Жывалкоўская (Нацыянальная бібліятэка Беларусі).
Загадчыца дзіцячай бібліятэкі № 16 г. Мінска Вольга Ціткова прачытала прозу на беларускай мове, з рамантычнай баладай Эдуарда Асадава выступіла Яўгенія Шаўцова (бібліятэка БДЭУ).
Валянціна Трушкевіч і Кацярына Роўда з Фундаментальнай бібліятэкі БДУ прадэкламавалі вершы ўласнага сачынення. Гледачы таксама пачулі творы Ф. Скарыны, Я. Купалы, Я. Коласа, М. Багдановіча і М. Танка на японскай мове ў выкананні супрацоўніцы Цэнтралізаванай сістэмы дзіцячых бібліятэк г. Мінска Тацумі Масако, якая ўзначальвае таварыства беларуска-японскай дружбы.
Шквал авацый выклікалі выканаўца танцавальнага нумара ва ўсходнім стылі Алеся Ціткова (дзіцячая бібліятэка № 16 г. Мінска) і супрацоўнік Нацыянальнай бібліятэкі Беларусі Віктар Літошык з гумарыстычнай пантамімай.
Фестываль аб’яднаў мноства абсалютна розных людзей, якія сталі блізкія адзін аднаму любоўю да творчасці і кнігі. Напрыканцы мерапрыемства ўдзельнікі атрымалі падарункі і былі адзначаны дыпломамі.
З нагоды Дня бібліятэк у кальцавым калідоры 2-га паверха Нацыянальнай бібліятэкі Беларусі размешчана тэматычная кніжная выстаўка “Сучасная бібліятэчная справа: тэорыя і практыка”, якая дапаможа вызначыць месца і стан бібліятэк у новым інфармацыйным асяроддзі. У экспазіцыі прадстаўлена літаратура пра самыя новыя сусветныя інфармацыйныя распрацоўкі, якія прымяняюцца ў бібліятэчнай дзейнасці, айчынным і замежным вопыце ўваходжання бібліятэк у лічбавую эру.
Чытайце таксама: