18 лютага ў Нацыянальнай бібліятэцы Беларусі адбыўся круглы стол “Гістарычная памяць. Палітычныя дзеячы XX стагоддзя ў літаратуры”.
Мерапрыемства прайшло ў рамках XXVIII Мінскай міжнароднай кніжнай выстаўкі-кірмашу і прымеркавана да выхаду ў свет у выдавецтве “Беларуская энцыклапедыя імя Петруся Броўкі” шэрагу кніг аб вядомых асобах краіны.
На пасяджэнні круглага стала адбылася прэзентацыя адной з іх – кнігі «Надежда Грекова. Михаил Малинин. Время помнить» беларускай пісьменніцы, сцэнарыста, кандыдата гістарычных навук, члена праўлення Саюза пісьменнікаў Расіі і Беларусі, члена Саюза пісьменнікаў Беларусі Наталлі Аляксандраўны Голубевай.
Выданне заснавана на дакументальных матэрыялах і прысвечана Надзеі Грэкавай, першаму старшыні Вярхоўнага Савета БССР, адзінай жанчыне ў палітычнай гісторыі Савецкага Саюза, і яе мужу, Міхаілу Малініну, выдатнаму палкаводцу, генералу арміі. Кніга – апісанне жыцця і дасягненняў двух неардынарных таленавітых людзей праз прызму часу, глабальныя трагічныя падзеі, палітычныя працэсы, аповед пра тое, як моцныя асобы ўплываюць на пераўтварэнне свету.
Выданне нагадвае чытачам пра ўнікальную, неадназначную гісторыю СССР і людзей, якія яе стваралі, закладваючы асновы для развіцця ўжо суверэнных дзяржаў.
Удзельнікі круглага стала – вучоныя, архівісты, пісьменнікі – абмеркавалі шырокае кола пытанняў: роля жанчыны ў палітыцы, захаванне гістарычнай памяці праз навуковыя даследаванні і літаратурныя творы, ваенна-патрыятычнае выхаванне і інш.
Матэрыял пададзены аддзелам сувязей з грамадскасцю.