18 мая ў бібліятэцы ў рамках XXV Міжнароднага форуму па інфармацыйна-камунікацыйных тэхналогіях “ТІБО” адбылася навукова-практычная канферэнцыя “Электронная культура”.
Арганізатары – Міністэрства культуры Рэспублікі Беларусь і Нацыянальная бібліятэка Беларусі.
З прывітальным словам да ўдзельнікаў пасяджэння звярнуліся намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша і галоўны спецыяліст упраўлення ўстаноў культуры і народнай творчасці Міністэрства культуры Рэспублікі Беларусь Сяргей Бацян.
Спецыялісты Беларускага дзяржаўнага ўніверсітэта культуры і мастацтваў, Нацыянальнага гістарычнага музея Рэспублікі Беларусь, Цэнтральнай навуковай бібліятэкі імя Якуба Коласа, Рэспубліканскай навукова-тэхнічнай бібліятэкі, Нацыянальнай бібліятэкі Беларусі і іншых устаноў абмеркавалі пытанні інавацыйнага развіцця культуры, навукі і адукацыі, распавялі пра сучасны стан устаноў культуры ў кантэксце развіцця інфармацыйнага грамадства і праектнай дзейнасці па захаванні і папулярызацыі гісторыка-культурнай спадчыны ў электронным асяроддзі, падзяліліся вопытам укаранення інавацыйных тэхналогій і прадастаўлення электронных паслуг.
У дакладах, прысвечаных інфармацыйна-камунікацыйным тэхналогіям у сферы культуры, былі закрануты самыя розныя аспекты выкарыстання інавацый у сацыякультурнай дзейнасці, перспектыўныя напрамкі інфармацыйна-тэхналагічнага развіцця і папулярызацыі гісторыка-культурнай спадчыны ў электронным асяроддзі.
У рамках пасяджэння спецыялісты абмеркавалі актуальныя пытанні развіцця інавацыйных тэхналогій у сферы культуры і абмяняліся вопытам укаранення інавацыйных тэхналогій і прадастаўлення электронных паслуг.
У ходзе канферэнцыі прагучалі даклады загадчыцы навукова-даследчага аддзела бібліятэказнаўства Марыны Пшыбытка (“Публічныя бібліятэкі ў інтэрнэт-прасторы: да праблемы дзяржаўнага статыстычнага назірання”), загадчыцы навукова-даследчага аддзела кнігазнаўства Галіны Кірэевай (“Прынцыпы распрацоўкі Дзяржаўнага рэестра кніжных помнікаў Рэспублікі Беларусь”), загадчыцы сектара падтрымкі сістэмы карпаратыўнай каталагізацыі аддзела бібліятэчна-інфармацыйных тэхналогій Алены Ішуцінай (“Тэхналагічныя аспекты стварэння рэгіянальнай сеткі зводнага электроннага каталога бібліятэк Беларусі”), загадчыцы аддзела даведачна-інфармацыйнага абслугоўвання Алены Тулупавай (“Навучальныя ролікі па рэсурсах і сэрвісах”, “Рэдагаванне спісаў і падбор літаратуры па тэме: новыя анлайн-сэрвісы”), галоўнага бібліятэкара аддзела абслугоўвання спецыялізаванымі фондамі Вольгі Ігнацьевай (“Праверка тэкстаў на запазычанні: новыя магчымасці Нацыянальнай бібліятэкі Беларусі”).
На заканчэнне сустрэчы ўдзельнікі мерапрыемства пазнаёміліся з прэзентацыяй галоўнага бібліятэкара навукова-даследчага аддзела кнігазнаўства Марыі Шопінай “Інтэрактыўнасць у музейнай дзейнасці Нацыянальнай бібліятэкі Беларусі” і наведалі музей кнігі Нацыянальнай бібліятэкі Беларусі.