Віртуальная чытальная зала Нацыянальнай бібліятэкі Беларусі запрашае чытачоў у інфармацыйную прастору свайго партнёра.
Анлайн-рэсурсы Цэнтральнай гарадской бібліятэкі імя М. Горкага Віцебска адлюстроўваюць гісторыю і сучаснасць сталіцы Прыдзвінскага краю, а таксама ўзровень развіцця інфармацыйнага патэнцыялу сучаснай гарадской бібліятэкі Беларусі, якая дасягнула залатога юбілею.
Своеасаблівым віртуальным мемарыялам гераізму і самаахвярнасці ўдзельнікаў Вялікай Айчыннай вайны, чые імёны звязаны з Віцебскам і Віцебскай вобласцю, з’яўляецца інфармацыйны праект “Час мужнасці”, падрыхтаваны бібліятэкарамі ў гонар 75-годдзя вызвалення Беларусі ад нямецка-фашысцкіх захопнікаў. Ён уключае інфармацыю пра Герояў Савецкага Саюза, партызанаў і падпольшчыкаў, салдатаў і афіцэраў, а таксама пра ключавыя моманты ў дзейнасці падпольных груп, аперацыі па вызваленні Віцебска. Тэкставая інфармацыя ілюструецца дакументальнымі фотаздымкамі ваенных гадоў.
“Ганаровыя грамадзяне Віцебска” – гэта групавы віртуальны партрэт асоб, удастоеных гэтага высокага звання за значны ўклад у сацыяльна-эканамічнае, навукова-тэхнічнае і культурнае развіццё Віцебска, а таксама за iншыя заслугі перад горадам. Прадстаўлены сярод іх як грамадзяне Рэспублікі Беларусь, якія пражываюць на тэрыторыі Віцебска і за яго межамі, так і грамадзяне замежных дзяржаў. Персанальная старонка кожнага лаўрэата ганаровага звання ўключае яго біяграфію, бібліяграфічную інфармацыю і фотагалерэю.
На сайце Цэнтралізаванай бібліятэчнай сістэмы Віцебска можна пазнаёміцца і з іншымі рэсурсамі, створанымі калектывам супрацоўнікаў бібліятэкі-юбіляра. Любы наведвальнік сайта мае магчымасць скарыстацца інфармацыйнымі сэрвісамі бібліятэкі, багаццю якіх па-добраму пазайздросцілі б чытачы першай публічнай бібліятэкі горада 100 гадоў таму.
Гэтыя і іншыя краязнаўчыя рэсурсы бібліятэк Беларусі даступныя таксама праз віртуальную чытальную залу НББ і вэб-навігатар “Беларусь у інфармацыйнай прасторы”.
Матэрыял прадастаўлены аддзелам карпаратыўнага ўзаемадзеяння.
