20 кастрычніка ў рамках рабочага візіту ў Рэспубліку Беларусь Нацыянальную бібліятэку Беларусі наведала прэзідэнт Літоўскай Рэспублікі Даля Грыбаўскайтэ.
У бібліятэцы адбылася яе сустрэча з прэзідэнтам Рэспублікі Беларусь Аляксандрам Лукашэнкам, падчас якой былі абмеркаваны пытанні супрацоўніцтва паміж дзвюма дзяржавамі ў розных сферах.
Высокіх гасцей вітаў дырэктар Нацыянальнай бібліятэкі Беларусі Раман Матульскі. Падчас агляднай экскурсіі кіраўнік літоўскай дзяржавы азнаёмілася з асноўнымі напрамкамі дзейнасці бібліятэкі, архітэктурна-канструкцыйнымі асаблівасцямі яе будынка, тэхнічным абсталяваннем, інфармацыйнымі рэсурсамі і мастацкім афармленнем інтэр’ераў.
У музеі кнігі ўвазе ганаровай госці была прадстаўлена калекцыя рарытэтных выданняў з фондаў Нацыянальнай бібліятэкі Беларусі. Спадарыня Грыбаўскайтэ пакінула памятны запіс у Кнізе ганаровых гасцей.
Прэзідэнт Літоўскай Рэспублікі падаравала Нацыянальнай бібліятэцы Беларусі факсімільнае выданне “Катэхізісу” Марціна Мажвідаса (першай кнігі, выдадзенай на літоўскай мове) і 2 каталога – “Кириллические рукописные книги, хранящиеся в Вильнюсе” і “Каталог коллекции библиотеки Сапег в фондах Университетской библиотеки”.
Дырэктар бібліятэкі ў сваю чаргу паднёс высокай госці падарункавае ілюстраванае выданне пра Нацыянальную бібліятэку Беларусі.
