У чытальнай зале гуманітарных навук Цэнтральнай навуковай бібліятэкі імя Я. Коласа НАН Беларусі дэманструецца выстаўка “520 год з дня нараджэння Францыска Скарыны, мысліцеля-асветніка”.
Францыск (Францішак) Скарына (каля 1490 – каля 1551) – культавая постаць беларускай нацыі, народжаная эпохай Рэнесанса. Першадрукар, літаратар, паэт, перакладчык, філолаг і самабытны філосаф – ён з’яўляецца сімвалам інтэлектуальнасці і невычэрпнага творчага патэнцыялу беларускага народа, увасабленнем велізарнай духоўнай сілы беларусаў. З асобай Ф. Скарыны звязаны пачатак новай культурнай традыцыі на Беларусі, пашырэнне гуманізму і адраджэнне духоўнасці.
Яго імя стаіць сярод славутых гістарычных імён сусветнага значэння як чалавека шматграннага таленту, вучонага-энцыклапедыста, высокаадукаванага доктара свабодных навук і медыцыны, які пакінуў яркі след у гісторыі нацыянальнай культуры ўсходнеславянскіх народаў, упершыню далучыўшы іх да кнігадрукавання.
Выданні Ф. Скарыны з’яўляюцца унікальнымі помнікамі свецкай рэнесансавай біблейскай пісьменнасці, здзяйсняючы вялікую культурна-гістарычную місію правадніка з сярэдневяковай цемры ў свет новых, гуманістычных ідэалаў.
Значэнне Скарыны як дзеяча культуры, пісьменніка, перакладчыка заключаецца ў тым, што ён падрыхтаваў той бурны росквіт кнігавыдавецкай справы, які пачаўся ў Беларусі і Літве пасля яго смерці ўжо ў другой палове ХVI ст. Ён узняў мастацкае аздабленне сваіх выданняў на такі высокі ўзровень, што яны служылі ўзорамі для пераймання не толькі сваім суайчыннікам, але і іншым народам.
На выстаўцы, якая працуе да 31 ліпеня, прадстаўлена літаратура пра жыццёвы і творчы шлях Францыска Скарыны.
Крыніца: Цэнтральная навуковая бібліятэка імя Я. Коласа НАН Беларусі
