Некаторым здаецца, што жыццё бібліятэкі летам замірае. На шчасце, жыццё кожнай дзіцячай бібліятэкі горада Мінска летам актывізуецца, становіцца яшчэ больш насычаным.
Адны ідуць са спісамі літаратуры для пазакласнага чытання, другія наведваюць бібліятэку з настаўнікамі ў складзе прышкольнага лагера, трэція, не абцяжараныя школьнымі прадметамі, з асалодай і радасцю выбіраюць кнігі «для душы».
Адным словам, тое, што дзеці не забываюць бібліятэку ў час канікул, радуе і настройвае бібліятэкараў на сур’ёзны лад.
Нядаўна ў дзіцячай бібліятэцы № 4 у межах літаратурнай гасцёўні адбылася сустрэча з Міхасём Пазняковым, старшынёй Мінскага гарадскога аддзялення СПБ. Міхась Паўлавіч прадставіў дзецям свае новыя кнігі для малодшага школьнага ўзросту, якія выйшлі ў выдавецтве “Народная асвета” ў серыі “Свет вакол нас”: “Радзіма”, “Роднае слова”, “У бары і на двары”, “Песня прыроды”, “Свята ўраджаю”, “У заапарку”, “Птушынае свята”.
Дзеці чыталі ўголас вершы, адгадвалі загадкі, паўтаралі за пісьменнікам скорагаворкі, “засыпалі” літаратара пытаннямі – ім было цікава ўсё. Да гэтай сустрэчы была падрыхтавана кніжная выстаўка “Дарыце радасць людзям”.
Наступным гаспадаром літаратурнай гасцёўні стаў дзіцячы пісьменнік Мікола Чарняўскі.
Аўтар публікацыі: Людміла Бусел, загадчык дзіцячай бібліятэкі № 4 г. Мінска.
Крыніца: газета “Літаратура і мастацтва”, 12.07.2013.
