Па ініцыятыве Мінскага гарадскога аддзялення Саюза пісьменнікаў Беларусі ў летнія канікулы ў кінатэатры “Ракета” раз на тыдзень перад пачаткам дзіцячага кінасеанса праводзіцца сустрэча з беларускімі дзіцячымі пісьменнікамі.
“Пісьменніцкі аўторак” – так называецца гэтая невялікая, але вельмі патрэбная акцыя. Не так даўно дзеці сустракаліся з пісьменніцай Аленай Міхаленкай, знаёміліся з яе апавяданнямі і вершамі. Кніжка пісьменніцы “Добрые сказки”, выдадзена па блаславенні Мітрапаліта Мінскага і Слуцкага Філарэта. Алена Іосіфаўна – педагог, а таксама рэдактар газеты “Воскресение” – на вельмі простых і зразумелых прыкладах, мякка і ненадакучліва дае запамінальныя ўрокі дабрыні, узаемаразумення, любові да бліжняга.
А некалькі дзён таму ў госці да хлопчыкаў і дзяўчынак завітаў пісьменнік Міхаіл Дзеравянка, не толькі аўтар фантастычных твораў і дзіцячых казак, але і заснавальнік і рэдактар цэлай серыі часопісаў для дзяцей: “Мишутка”, “Тигра”, “Мамино солнышко”, “Журавлик”.
– Дзіцячая літаратура, вядома ж, павінна вучыць дабрыні, гэтай вечнай і жаданай перамозе дабра над злом, – упэўнены Міхаіл Андрэевіч, – але мэта нашых часопісаў яшчэ і развіваць. Мы стараемся ў даступнай забаўляльнай форме навучыць дзяцей самастойнаму мысленню, уважлівасці, правільнай гаворцы... Бо, па меркаванні псіхолагаў, у 5–7 гадоў яны незвычайна ўспрымальныя да ўсяго, і маленькі чалавечак у гэтым узросце можа запомніць столькі, колькі яму часам не адужаць за ўсё астатняе жыццё.
Міхаіл Андрэевіч прыйшоў да дзяцей не адзін, а з казачнымі героямі сваіх твораў – Мішуткам і Гузікам, якія прапанавалі хлопчыкам і дзяўчынкам рашыць задачы, разгадаць загадкі і шарады ды адказаць на пытанні.
Дзеці, сярод якіх былі і часовыя выхаванцы дзіцячага прытулку, вельмі шчыра радаваліся сустрэчы, падарункам – кніжкам і часопісам. Ды запрашалі часцей прыходзіць у госці.
Крыніца: газета “Літаратура і мастацтва” 20.07.2012
Аўтар публікацыі – Лізавета Палеес
