На званіцы Свята-Варварынскай царквы ў Пінску з’явілася дошка ў памяць аб шлюбе беларускага Песняра.
Месца вянчання Канстанціна Міцкевіча і Марыі Каменскай доўгі час заставалася невядомым. Раскрыць таямніцу дапамог выпадак. У адным са сваіх інтэрв’ю архіепіскап Пінскі і Лунінецкі Сцяфан абмовіўся, што ў пінскім храме ў метрычнай кнізе захаваўся запіс аб заключэнні шлюбу паміж Канстанцінам Міхайлавічам і Марыяй Дзмітрыеўнай. Сваякі пісьменніка звярнуліся ў Пінскі гарвыканкам з просьбай дапамагчы знайсці гэты важны дакумент.
– Кожная нацыя мае сваіх герояў, якія рабілі ўсё магчымае для станаўлення свайго народа, – адзначыў архіепіскап Пінскі і Лунінецкі Сцяфан падчас цырымоніі адкрыцця памятнай дошкі. – Для рускіх – Аляксандр Пушкін, для ўкраінцаў – Тарас Шаўчэнка, для беларусаў – гэта Якуб Колас. Мы можам ганарыцца тым, што вялікі сын зямлі беларускай пражыў пэўны час на Піншчыне. Гасподзь даў нам магчымасць адкрыць архіўныя дакументы, якія сведчаць аб тым, што менавіта ў гэтай царкве Канстанцін Міцкевіч пабраўся шлюбам з Марыяй Каменскай, пасля чаго паўстала вельмі моцная сям’я.
Нагадаем, у Пінску Якуб Колас правёў тры гады: з 1912-га па 1915-ты. Тут заклаўся падмурак яго сям’і: пісьменнік сустрэў настаўніцу Марыю Каменскую, з якой ажаніўся ў 1913 годзе і пражыў у шлюбе больш за 30 гадоў. У горадзе на Піне нарадзіўся першы сын Якуба Коласа – Даніла. Менавіта Піншчына натхніла Песняра напісаць трылогію “На ростанях”.
Ва ўрачыстасцях прынялі ўдзел аматары творчасці Якуба Коласа, яго родныя – нявестка Аляўціна Цімафееўна Міцкевіч і дзве ўнучкі – Вера Данілаўна і Марыя Міхайлаўна. Мемарыяльную дошку на званіцы асвяцілі, затым госці і сваякі пісьменніка наведалі Музей Беларускага Палесся і коласаўскія мясціны на Піншчыне.
Аўтар публікацыі: Надзея Паўлава.
Крыніца: газета “Звязда”
Чытайце таксама:
