Па добрай традыцыі штогод падчас святкавання Дня горада Брэста каля Цэнтральнай гарадской бібліятэкі імя А.С. Пушкіна на свята кнігі “Бульвар, дзе чытаюць” збіраецца шмат жыхароў і гасцей горада.
Сёлета аматарам друкаванага слова быў прапанаваны экскурс у гісторыю горада 1950-х гадоў. Цікавыя выстаўкі, падрыхтаваныя супрацоўнікамі кніжніцы, дапамаглі ўспомніць або даведацца пра падзеі той эпохі, адчуць подых часу.
– Стыльная вінтаж-акцыя “Спадніца – сонца, штаны – клёш” аб’яднала на сваёй пляцоўцы прыхільнікаў рэтра, якія змаглі патанцаваць, паслухаць музыку і нават зрабіць макіяж ды фотасесію ў стылі пяцідзясятых гадоў, – распавяла загадчык аддзела бібліятэчнага маркетынгу Брэсцкай гарадской цэнтралізаванай бібліятэчнай сістэмы Святлана Гарадзецкая.
Сёлетні “Бульвар, дзе чытаюць” стаў сапраўдным увасабленнем сацыяльнага партнёрства. Канцэртная праграма з удзелам юных спевакоў – Ганны Ермаковіч, Ангеліны Піпер, Аляксея Маата ды іншых спрыяла святочнаму настрою. Удзельнікі клуба ваенна-гістарычнай рэканструкцыі “Рубеж” прадставілі інсцэніроўку з жыцця пачатку 1950-х гадоў. А члены клуба “BreStarDance” пад кіраўніцтвам Аляксандра Чарнова арганізавалі танцавальны флэшмоб.
Брэсцкі абласны краязнаўчы музей і ЦГБ імя А.С. Пушкіна падрыхтавалі цікавую інтэр’ерную экспазіцыю, якая карысталася папулярнасцю ў аматараў незвычайных фотасесій, як і аўтамабіль “Волга” ад клуба рэтра-аўтамабіляў “Адам”. Галерэя кніжных і фотавыставак прадставіла рэдкія экзэмпляры кніг 1950-х гадоў выдання з фондаў Брэсцкай ГЦБС, унікальныя фотаздымкі Брэста тых часоў.
Галоўным момантам свята стаў паэтычны марафон з удзелам таленавітых мастакоў слова Берасцейшчыны, на які сёлета выйшлі не толькі майстры прыгожага пісьменства – Зінаіда Дудзюк, Іван Мельнічук, Любоў Красеўская ды іншыя, – але і зусім маладыя прадстаўнікі творчага маладзёжнага руху “Бульвар” – Улад Чынін і Карына Казаран.
Аўтар публікацыі: Міра Іўковіч.
Крыніца: газета “Літаратура і мастацтва”