Сёння ў краіне знаходзіцца дваццаць восем асобнікаў кніг Скарыны. Хутка іх стане больш.
На час іх гатовы прадаставіць некалькі замежных устаноў. Яны будуць экспанавацца на выстаўках, якія восенню адкрыюцца ў Нацыянальнай бібліятэцы і Нацыянальным гістарычным музеі.
У нас ужо не першы год усталёўваюцца добрасуседскія адносіны з галоўнымі бібліятэкамі і архівамі Расіі, Украіны, Літвы і іншых краін, якія маюць дачыненне да імя Францыска Скарыны. Намеснік дырэктара па навуковай рабоце і выдавецкай дзейнасці Нацыянальнай бібліятэкі Алесь Суша гаворыць, што дзякуючы гэтаму ўжо ўдалося сабраць вялікую віртуальную спадчыну нашага першадрукара. Але хочацца большага. Таму зараз актыўна вядуцца перагаворы менавіта наконт таго, каб рарытэтныя экзэмпляры завіталі на выстаўку, якая 14 верасня адкрыецца ў бібліятэцы. Значная яе частка будзе прысвечана гісторыі кнігадрукавання. Там будуць прадстаўлены арыгіналы беларускіх паслядоўнікаў Скарыны, а таксама паліграфічныя тэхналогіі тых часоў.
Нешта падобнае будзе і ў Нацыянальным гістарычным музеі. Там ужо Дамовіліся пра тое, каб іх маскоўскія калегі прывезлі сюды “Біблію”. Але гэта не адзіны сюрпрыз для наведвальнікаў музея. Там збіраюцца аднавіць варштат, дзякуючы якому кожны зможа зрабіць адбітак накшталт таго, што былі ў час Скарыны. Наогул жа восенню ў гістарычным цалкам зменіцца пастаянная экспазіцыя, прысвечаная кнізе.
У Полацку, дзе падчас Дня беларускага пісьменства і пройдуць асноўныя мерапрыемствы з нагоды 500-годдзя кнігадрукавання, таксама рыхтуюць шмат сюрпрызаў. Распачнецца свята яшчэ ў жніўні, калі творцы з усіх куткоў з’едуцца на пленэр “Полацк у гравюрах сучасных мастакоў”. Прыемна, што на прапанову стаць партнёрамі розных акцый ахвотна адгукаюцца дзяржаўныя і камерцыйныя ўстановы. Дзякуючы ім на базе музея беларускага кнігадрукавання пройдуць выстаўкі, канцэрты і нават лялечнае прадстаўленне. Усё гэта так ці інакш будзе звязана з жыццём Францыска Скарыны.
Аўтар публікацыі: Наталля Сцяпура.
Крыніца: газета “Рэспубліка”, 20.03.2017.
Чытайце таксама:
- Скарынаў след у Лондане
- “Маем найбольшае самі”
- Алесь Суша – Алесь Карлюкевіч: ці інтэграваны Скарына ў наша жыццё?
- Алесь Суша – Алесь Карлюкевіч: скарынаўскі грунт
- Рыхтуецца да выхаду дзіцячая кніга “У гасцях у Францыска Скарыны”
- Падарунак для першадрукара
- Версіі вакол Скарыны
- Скарына ў ролі Бонда
- У архівах Ватыкана знойдзены новыя звесткі пра Францыска Скарыну
- Францыск Скарына на мовах народаў свету
- Прывітанне ад Францыска Скарыны
