Гісторык і экскурсавод Іван Сацукевіч прадставіў на ХХVIII Мінскай міжнароднай кніжнай выставе-кірмашы сваю кнігу “Минск: из руин к процветанию”. Выданне прысвечана пасляваеннай гісторыі сталіцы ў перыяд з 1944 па 1979 год.
Калекцыя чорна-белых фотаздымкаў, пакладзеная ў аснову кнігі, была знойдзена ў Беларускім дзяржаўным архіве кінафотафонадакументаў. Выдавецкі праект прысвечаны пасляваеннаму аднаўленню Мінска з руін.
– Архіў кіна- і фотадакументаў, які знаходзіцца ў былым Койданаве – гэта сапраўдны Кландайк цікавых фотадакументаў, па якіх можна вывучаць гісторыю краіны, – расказаў Іван Сацукевіч. – Я прыехаў туды 17 гадоў таму, калі пісаў кнігу пра гісторыю Мінска. Быў ўражаны фотаздымкамі і захацеў, каб іх убачылі людзі. Мінск – жывы арганізм, які становіцца іншым, мяняецца, разбудоўваецца. Цудоўная падборка фотаздымкаў 50-х, 60-х, 70-х гадоў, якая захоўвалася ў архіве, патрабавала сістэматызацыі і структурызацыі. Мы адабралі старыя фотаздымкі і дадалі новыя. Аўтарам сучасных фота выступіў Анатоль Дрыбас. Так мы можам распавесці пра наш горад нашым дзецям і ўнукам.
У новай кнізе мы хацелі паказаць, як змяніўся Мінск за першыя 30 гадоў пасля вайны. Мы раздзялілі яе на 15 раздзелаў-блокаў, якія паступова раскрываюць для нас гісторыю Мінска. Праз кнігу можна даведацца, як Мінск пацярпеў падчас вайны, якія раёны былі найбольш разбураныя і чаму, і як аднаўляўся наш горад, чаго каштавала гэта праца нашым дзядам, каб горад зноў пачаў жыць.
Можна даведацца, як выглядала Прывакзальная, Цэнтральная і Круглая плошчы, якія былі архітэктурныя формы, як выглядалі першыя тралейбусы ў 50-я гады. Залатая Горка, Доўгі Брод, Пярэспа – такімі назвамі карысталіся нашы продкі, сёння пра гэта можна прачытаць у кнізе.
Аўтар публікацыі: Эла Дзвінская, фота аўтара.
