Заняткі “Бібліятэка – дом, дзе жывуць кнігі”

Запрашаем у нядзелю, 16 верасня, дзетак 8–12 гадоў і іх бацькоў на заняткі “Бібліятэка – дом, дзе жывуць кнігі”, прысвечаныя Дню бібліятэк.

Удзельнікі пазнаёмяцца з будынкам самай вялікай бібліятэкі краіны і даведаюцца, як арганізавана ў ім кніжнае жыццё.

Дзецям будзе прапанавана паглядзець на бібліятэку не толькі вачыма гасцей. Падчас заняткаў яны стануць бібліятэкарамі і будуць ажыццяўляць пошук дакументаў у электронным каталогу, паспрабуюць знайсці кнігу ў падсобным фондзе і абслужыць карыстальніка.

Удзельнікі пабываюць у незвычайнай чытальнай зале – зале рукапісаў, старадрукаў і рэдкіх кніг, дзе чытаюць толькі навукоўцы.

Заняткі завершацца творчым заданнем – кожны ўдзельнік прапануе свой варыянт каляровага афармлення галоўнай бібліятэкі краіны.

Заняткі праводзяцца ў даступнай і займальнай форме. Пазнанне кніжнай культуры адбываецца з дапамогай дыялогу, гульняў і творчасці.

Пачатак мерапрыемства: а 13-й гадзіне.

Працягласць: 60 хвілін.

Кошт: 4 руб. 50 кап.

Адрас: Нацыянальная бібліятэка Беларусі, пр. Незалежнасці, 116, г. Мінск