Дата правядзення
Час правядзення
Месца правядзення
З 1 па 28 мая ў зале дакументаў па мастацтве (пам. 306) праходзіць кніжна-ілюстрацыйная выстаўка “Кароль містыфікацыі”, прысвечаная 115-годдзю з дня нараджэння іспанскага мастака, аднаго з заснавальнікаў і вядучых майстроў сюррэалізму Сальвадора Далі (1904–1989).
Цяжка назваць іншага мастака, вакол імя якога склалася б такая велізарная колькасць міфаў. І гэта не дзіўна: Сальвадор Далі лічыў сваё існаванне на публіцы яшчэ адной гранню творчасці і таму разнастайнымі новымі задумамі, часам скандальнымі, пастаянна правакаваў цікавасць да сваёй асобы. Аднак і па-за флёрам эпатажу, парадоксаў і містыфікацый абсалютна ясна, што ўніверсальны маэстра – жывапісец, графік, скульптар, дызайнер, пісьменнік, паэт, тэарэтык, сцэнарыст, аўтар лібрэта – займае ўнікальнае па сваім значэнні месца ў мастацкай культуры ХХ стагоддзя.
На выстаўцы экспануюцца альбомы, рэпрадукцыі і паштоўкі з найбольш значнымі, а таксама менш вядомымі працамі майстра, якія прадстаўляюць таямнічае, жудаснае і адначасова прывабнае фантастычнае відовішча. Творы “Прадчуванне грамадзянскай вайны”, “Геапалітычнае немаўля, якое назірае нараджэнне новага чалавека”, “Пастаянства памяці”, “Спакуса святога Антонія”, “Жырафа, якая гарыць”, “Твар вайны”, “Метамарфозы Нарцыса” і многія іншыя работы ва ўспрыманні гледача могуць атаясамлівацца як са злом, так і з дабром. У іх выказана парадаксальнасць таленту Далі, яго непрадказальнасць і непаўторнасць. Супярэчнасці, якія мучылі мастака, нараджалі ў яго ўяўленні мудрагелістыя карціны свету, штурхалі на шлях наўмысных містыфікацый. Сваёй творчасцю ён нібы нагадваў пра тое, што “сон розуму нараджае пачвар”.
Самая светлая і лірычная частка экспазіцыі прысвечана партрэтам Галы – жонкі мастака. Менавіта гэтая жанчына стала нязменнай музай, натхненнем генія вялікага майстра, увасабленнем яго другога “я”. На выстаўцы дэманструецца рэпрадукцыя карціны “Атамная Леда” з выявай Галы – сапраўднага шэдэўра Далі, які паклаў пачатак рэлігійнаму перыяду ў яго творчасці.
У экспазіцыю таксама ўваходзяць біяграфічныя матэрыялы, сярод якіх найбольшую цікавасць выклікае аўтабіяграфія Сальвадора Далі “Дневник одного гения”. Прызнанні пра сваё жыццё і вытанчаныя іранічныя развагі пра людзей і прадметы, не толькі шакіруюць, але і дазваляюць зірнуць на навакольны свет вачыма найвялікшага арыгінала ХХ стагоддзя. Ацаніць нечаканыя выдумкі мастака, вобразнасць непрадказальнага мыслення і лепш зразумець творчасць мэтра сюррэалізму дапаможа яго ўласная кніга “50 магических секретов мастерства”.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял прадастаўлены аддзелам абслугоўвання спецыялізаванымі фондамі.