Дата правядзення
Час правядзення
Месца правядзення
З 11 студзеня па 28 сакавіка ў зале прававой інфармацыі (пам. 207b) адкрыта тэматычная выстава “Канстытуцыі Рэспублікі Беларусь: правы, абавязкі, адказнасць”, прысвечаная Дню Канстытуцыі Рэспублікі Беларусь (15 сакавіка).
Канстытуцыя суверэннай Рэспублікі Беларусь была прынята 15 сакавіка 1994 года Вярхоўным Саветам. У далейшым змены і дапаўненні ў Канстытуцыю ўносіліся тройчы (заўсёды – шляхам рэферэндуму).
Канстытуцыя з’яўляецца прававым падмуркам дзяржаўнага і грамадскага жыцця, асноўнай крыніцай нацыянальнай прававой сістэмы. Яна вызначае канстытуцыйны лад, галоўныя ўстоі дзяржавы і забяспечвае сваімі прадпісаннямі і законамі іх стабільнасць і надзейную абарону, умацоўвае палітычны і ідэалагічны плюралізм, а таксама прававы статус чалавека і грамадзяніна.
Структура Канстытуцыі Рэспублікі Беларусь стандартная: прэамбула, асноўная частка і заключныя, пераходныя палажэнні. Канстытуцыя складаецца са 146 артыкулаў, усе яе палажэнні неабходна разумець у сістэмнай узаемасувязі. Яна валодае вяршэнствам адносна ўсіх іншых прававых актаў, складае ядро прававой сістэмы дзяржавы. Адметнымі рысамі дзеючай Канстытуцыі з’яўляюцца: замацаванне ў якасці эканамічнай асновы разнастайнасці форм уласнасці; устанаўленне роўнасці дзяржавы і грамадзяніна, наяўнасць у іх узаемных абавязацельстваў; арыентацыя заканадаўства на агульнапрызнаныя прынцыпы міжнароднага права; падзел і ўзаемадзеянне ўлад; прамы характар дзеяння Канстытуцыі.
За ўсю гісторыю развіцця Беларусі як самастойнай, незалежнай дзяржавы ў краіне дзейнічала пяць канстытуцый. Канстытуцыя як прадукт дзяржавы адлюстроўвае ўзровень развіцця ўсяго грамадства, характар уладных адносін, якія склаліся на момант яе прыняцця. Гэта першая ў гісторыі беларускай дзяржавы Канстытуцыя, якая на вышэйшым заканадаўчым узроўні замацавала ідэю прававой дзяржавы як базавую каштоўнасць нашага грамадства.
Экспазіцыя налічвае каля 70 дакументаў: кнігі, аўтарэфераты дысертацый, перыядычныя выданні.
Выстава адрасуецца заканадаўцам, навуковым работнікам, выкладчыкам, аспірантам і студэнтам юрыдычных і гістарычных факультэтаў, палітолагам і ўсім, хто цікавіцца канстытуцыйным правам і гісторыяй дзяржавы і права.
Выстава ўключае наступныя тэматычныя раздзелы:
- Дзяржаўная Канстытуцыя Рэспублікі Беларусь: роля і значэнне
- Этапы стварэння пятай Канстытуцыі Рэспублікі Беларусь: распрацоўка, праекты, прыняцце
- Роля канстытуцыйнага кантролю ў Рэспубліцы Беларусь на сучасным этапе
- Гістарычныя вехі Канстытуцыі БССР 1919, 1927, 1937 1978 гадоў
Карысныя спасылкі:
- Канстытуцыі Беларусі
- Акты Беларускай Народнай Рэспублікі
- Акты перыяду аднаўлення беларускай дзяржаўнасці
- Акты РСФСР адносна Беларусі 1917–1918 гадоў
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 28.
Матэрыял пададзены аддзелам абслугоўвання афіцыйнымі дакументамі.