Прывесці ў рух энергію сумлення (+відэа)

З 21 верасня па 15 лістапада ў зале беларускай літаратуры (пам. 205) праходзіць выстаўка “Прывесці ў рух энергію сумлення”, прысвечаная 90-годдзю з дня нараджэння народнага паэта Беларусі, літаратуразнаўца, фалькларыста, перакладчыка, заслужанага дзеяча навукі Беларусі Ніла Сымонавіча Гілевіча (1931–2016).

Раздзелы экспазіцыі “Слова – роднае, жывое, свабоднае”, “І ўсё ж мы дойдзем, дойдзем мы да Беларусі”, “Песенная панарама”, “Звонкае сэрца паэта”, “Вы шуміце, шуміце нада мною, бярозы” поўна раскрываюць жыццёвы і творчы шлях паэта.

Багатая літаратурная спадчына пісьменніка прадстаўлена зборам твораў у 23-х тамах, кнігамі выбраных твораў, зборнікамі лірыкі, раманам у вершах “Родныя дзеці”, паэмай “Сказ пра Лысую гару”, зборнікам п’ес “Начлег на буслянцы”, аўтабіяграфічнай аповесцю “Перажыўшы вайну”, зборнікамі літаратурна-крытычных і публіцыстычных артыкулаў, кнігамі сатыры і гумару, творамі для дзяцей і інш.

Творы Ніла Гілевіча перакладзены на шматлікія мовы свету. Раздзел “Звонкае сэрца паэта” знаёміць наведвальнікаў з творамі аўтара на балгарскай, польскай, рускай, англійскай, іспанскай і іншых мовах, а таксама з перакладчыцкай дзейнасцю пісьменніка.

На словы паэта пісалі музыку шматлікія беларускія кампазітары: М. Чуркін, М. Аладаў, Я. Цікоцкі, А. Багатыроў, У. Алоўнікаў, Я. Глебаў, І. Лучанок, Дз. Смольскі, Э. Ханок і інш. Вершы паэта “Вы шуміце, бярозы”, “Жаўраначка”, “Шлях да Беларусі”, “Родная мова”, “Край мой беларускі, край” і шмат іншых сталі любімымі песнямі ў народзе. Зборнікі нот сабраны ў раздзеле “Песенная панарама”.

Матэрыялы раздзела “Вы шуміце, шуміце нада мною, бярозы” прысвечаны даследаванню шматграннай творчасці Ніла Сымонавіча. Пра паэта пісалі: Г. Сіненка, І. Навасельцава, Г. Ішчанка, В. Каратай, Ц. Чарнякевіч, М. Скобла, В. Смаль і інш.

Тэлефон для даведак: (8 017) 293 27 16.