Дата правядзення
Час правядзення
Месца правядзення
18 лістапада ў Нацыянальнай бібліятэцы Беларусі адбудзецца круглы стол “«Сцежкамі…» Міхася Зарэцкага”, прымеркаваны да юбілею пісьменніка.
Сёлета 20 лістапада адзначаецца 120-годдзе з дня нараджэння беларускага пісьменніка, крытыка і перакладчыка Міхася Зарэцкага (1901–1937), які быў сапраўднай літаратурнай зоркай 1920-х гг. Творы Зарэцкага (Міхаіла Яўхімавіча Касянкова) не проста карысталіся вялікім попытам чытачоў, але і своеасабліва ўздзейнічалі на пачуцці чытача. Вядомы нават такія факты, калі яго кнігі выносілі з бібліятэк, выкрадалі з шафаў, а з некаторых выданняў былі вырваны найбольш цікавыя старонкі.
27 студзеня 2021 г., напярэдадні юбілею пісьменніка, у Нацыянальнай бібліятэцы Беларусі быў арганізаваны навукова-практычны семінар “Шляхамі маладнякоўцаў”: да 135-годдзя Змітрака Бядулі і 120-годдзя Міхася Зарэцкага, які рэалізоўваўся ў межах маштабнага праекта “На хвалі часу, у плыні жыцця”: да 100-годдзя літаб’яднання “Маладняк”.
Круглы стол “«Сцежкамі…» Міхася Зарэцкага” прадугледжвае прэзентацыю вялікай віртуальнай экспазіцыі, створанай Нацыянальнай бібліятэкай Беларусі сумесна з партнёрамі праекта. Чакаецца, што ўдзел у навуковым пасяджэнні прымуць даследчыкі літаратуры (у прыватнасці творчасці Міхася Зарэцкага), прадстаўнікі архіваў і музеяў, бібліятэк і выдавецтваў, сродкаў масавай інфармацыі.
Мерапрыемства пройдзе ўжывую з трансляцыяй на платформе YouTube. Трансляцыя і яго пазнейшы відэазапіс будуць даступныя тут:
Пачатак круглага стала 18 лістапада а 11-й гадзіне ў прэс-цэнтры Нацыянальнай бібліятэкі Беларусі (пам. 308).
Запрашаем!
Матэрыял пададзены інфармацыйна-аналітычным аддзелам.