“Беларускі погляд Даўгаўпілса”: у бібліятэцы адкрыецца фотавыстава Эдуарда Літвіноўскага

22 лістапада ў рамках Года народнага адзінства пачала працу фотавыстава “Беларускі погляд Даўгаўпілса”, арганізаваная Нацыянальнай бібліятэкай Беларусі і Рэспубліканскім цэнтрам нацыянальных культур.

Аўтар – фотамастак-пачатковец Эдуард Літвіноўскі, ураджэнец латвійскага горада Даўгаўпілса. Эдуард мае беларускія карані па бацькавай лініі і цесна супрацоўнічае з Цэнтрам беларускай культуры Даўгаўпілскага гарадскога самакіравання.

Экспазіцыя ўключае больш за 40 работ. Фотамастак аб’яднаў беларусаў, якія пражываюць у Латгаліі, у адной фотасесіі: у нацыянальных касцюмах на фоне пейзажаў і гарадскога асяроддзя ў розны час года. На выставе можна ўбачыць багацце і разнастайнасць беларускага нацыянальнага касцюма, а таксама зачаравальныя віды Даўгаўпілса і яго ваколіц.

Мерапрыемства пройдзе ў рамках творчай стажыроўкі для кіраўнікоў замежных беларускіх непрафесійных калектываў мастацкай творчасці і старшынь грамадскіх аб’яднанняў беларусаў замежжа ў Рэспубліку Беларусь, арганізаванай Міністэрствам культуры Рэспублікі Беларусь.

Гасцей чакае экскурсія па “алмазе ведаў”, падчас якой яны пазнаёмяцца з гісторыяй і рэсурсамі Нацыянальнай бібліятэкі і яе магчымасцямі як найбуйнейшага інфармацыйнага і сацыякультурнага цэнтра краіны.

Выстава будзе працаваць па 28 лістапада 2021 г. у галерэі “Мабільная” (3-ці паверх).
Дата яе заканчэння можа быць зменена.