Нязломны: Аляксей Талай

25 лютага ў бібліятэцы адбудзецца прэзентацыя кнігі “Нязломны: Аляксей Талай”, арганізаваная Нацыянальнай бібліятэкай Беларусі і Выдавецкім домам “Звязда”.

Аляксей Талай – параалімпійскі чэмпіён, спартыўны і грамадскі дзеяч, бізнесмен, шчаслівы муж і бацька чацвярых дзяцей, а яшчэ член Канстытуцыйнай камісіі, матывацыйны аратар і мецэнат, дабрачынны фонд імя якога нядаўна быў удастоены прэміі Прэзідэнта Рэспублікі Беларусь “За духоўнае адраджэнне”.

Выбух міны, якая затаілася з вайны, зрабіў шаснаццацігадовага падлетка іншым. Іншым стала ўсё яго жыццё, якое ўрачам цудам удалося выратаваць. Як 16-гадовы хлопец навучыўся жыць у новых для сябе ўмовах і як працаваў над сілай волі і духу – у апавяданнях самога героя і яго блізкіх: маці Людмілы, жонкі Анастасіі, урачоў, трэнераў, калег і сяброў.

Кніга журналісткі Валерыі Сцяцко “Нязломны: Аляксей Талай” – пра барацьбу за жыццё і пераадоленне цяжкасцей, пра шлях да алімпійскіх вышынь, цяжкую працу і перамогу, пра родных і блізкіх, сяброў і чалавечае шчасце.

Падчас мерапрыемства адбудзецца сустрэча з аўтарам выдання,  Аляксеем Талаем, і ўдзельнікамі выдавецкага праекта.

Прэзентацыя пачнецца а 17-й гадзіне ў галерэі “Лабірынт” (3-ці паверх). Уваход вольны.