Дата правядзення
Час правядзення
Месца правядзення
З 25 кастрычніка па 9 студзеня ў зале прававой інфармацыі (пам. 207b) арганізавана выстава “Першай жанчыне – доктару юрыдычных навук на Беларусі прысвячаецца: да 95-годдзя з дня нараджэння Ізабелы Іванаўны Марціновіч”.
Экспазіцыя ўключае наступныя тэматычныя раздзелы:
- Бібліяграфія публікацый прафесара І.І. Марціновіч:
- манаграфіі, выданні, падрыхтаваныя ў сааўтарстве;
- падручнікі, навучальныя дапаможнікі і навучальныя матэрыялы;
- артыкулы ў часопісах;
- артыкулы ў зборніках навуковых прац, дакладаў і тэзісаў канферэнцый.
- Матэрыялы па біяграфіі і літаратурнай спадчыне І.І. Марціновіч.
Выстава разлічана на шырокае кола чытачоў, якія цікавяцца жыццём і дзейнасцю прадстаўнікоў айчыннай юрыдычнай навукі.
Сярод пляяды вядомых беларускіх навукоўцаў-юрыстаў Ізабела Іванаўна Марціновіч займае асаблівае месца. Гэта першая ў Беларусі жанчына, якой прысвоена вучоная ступень доктара юрыдычных навук, вучонае званне прафесара.
Ізабела Іванаўна нарадзілася 27 кастрычніка 1927 г. у г.п. Багушэўск Віцебскай вобласці ў сям’і служачага. У 1945 г. пасля заканчэння школы з залатым медалём дзяўчына без уступных экзаменаў паступае ў Мінскі юрыдычны інстытут, а ў 1949 г., скончыўшы яго з адзнакай, – у аспірантуру. У 1954 г. паспяхова праходзіць абарона яе кандыдацкай дысертацыі “Прынцып галоснасці ў савецкім крымінальным працэсе”, а ў 1969 г. – доктарскай “Развіццё суда і крымінальна-працэсуальных форм судовай дзейнасці ў Беларускай ССР”. Пасля абароны навуковай працы з’яўляюцца актуальныя і сёння шматлікія публікацыі прафесара, выкананыя на аснове аналізу заканадаўства, практыкі яго прымянення.
Ёю была абгрунтавана ідэя аб неабходнасці стварэння ў Беларусі ювенальнай юстыцыі і прапанавана мадэль яе арганізацыі, распрацаваны прапановы па мадэрнізацыі арганізацыйных форм адвакацкай дзейнасці, уніфікацыі і гарманізацыі заканадаўства аб судаўладкаванні Рэспублікі Беларусь і Расійскай Федэрацыі. Дзесяць гадоў І.І. Марціновіч была членам Пастаяннай палаты міжнароднага трацейскага суда ў Гаазе, у якасці эксперта-распрацоўніка ўдзельнічала ў падрыхтоўцы праекта Канстытуцыі Рэспублікі Беларусь 1994 г. і канцэпцыі судова-прававой рэформы ў Беларусі.
Шмат сіл і часу аддавала Ізабела Іванаўна справе падрыхтоўкі юрыстаў на юрыдычным факультэце Беларускага дзяржаўнага ўніверсітэта: у вучэбнай аўдыторыі, падчас кіравання навукова-даследчай працай, у савеце па абароне дысертацый. Прафесар прывіла любоў да навуковай дзейнасці многім сваім студэнтам яшчэ пры рабоце над дыпломнымі працамі, што пасля вылілася ў абарону імі дысертацыйных даследаванняў. Ізабела Іванаўна надрукавала каля 180 навуковых прац, у тым ліку 9 манаграфій, была сааўтарам падручнікаў і навукова-практычных каментарыяў. Падрыхтавала 4-х кандыдатаў і аднаго доктара юрыдычных навук. За поспехі ў навукова-педагагічнай дзейнасці ёй прысвоены званні заслужанага юрыста Рэспублікі Беларусь, заслужанага работніка вышэйшай школы БССР і заслужанага работніка Беларускага дзяржаўнага ўніверсітэта. Прафесар І.І. Марціновіч узнагароджана Граматай Вярхоўнага Савета БССР, яна лаўрэат прэміі імя У.І. Пічэты і вышэйшай юрыдычнай прэміі “Феміда”.
16 лютага 2021 г. Ізабела Іванаўна пайшла з жыцця. Навука страціла бліскучага вучонага, які валодаў тонкай прававой інтуіцыяй і найшырэйшай юрыдычнай эрудыцыяй.
Экспазіцыя, прысвечаная першай жанчыне – доктару юрыдычны навук на Беларусі, налічвае каля 60 дакументаў: гэта кнігі, перыядычныя выданні, аўтарэферат дысертацыі на рускай і беларускай мовах.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 28.
Матэрыял пададзены аддзелам абслугоўвання афіцыйнымі дакументамі.